Tërmeti 6.4 ballë i cili shkaktoi vdekjen e dhjetëra personave dhe plagosi qindra të tjerë në zonat e Durrësit, ka dëmtuar dhe banesat në Tiranë.
Ndërkohë, bashkia e Tiranës u ka bërë thirrje banorëve, shtëpitë e të cilave janë klasifikuar si të pabanueshme, që të zbatojnë udhëzimin për evakuim.
Bashkia e Tiranës, përmes një njoftimi për mediat shprehet se se grupet e punës me përbërje inxhinierë konstruktor, kanë konstatuar se disa godina janë të pabanueshme në Tiranë dhe kanë udhëzuar evakuimin e banorëve, por në 4 pallate, punonjësit e bashkisë në terren kanë hasur në rezistencën e banorëve, të cilët nuk pranojnë të lënë banesat e tyre.
Për këtë arsye, Bashkia e Tiranës kërkon bashkëpunimin e qytetarëve për të liruar menjëherë ndërtesat që janë të klasifikuar si të pabanueshme nga Instituti i Ndërtimit.
Pallatet ndodhen në njësitë e mëposhtme:
– Njësia Administrative 11, rruga “Fatmir Gjata”, Kodër Kamëz;
– Njësia Administrative 4, pallati i ish-Konvikteve të Komunales së Tiranës, zona e Alliasit, Godina 1 dhe 2;
– Njësia Administrative 4, pallati nr. 4, rruga “Myslym Keta”;
– Njësia Administrative 6, pallati nr. 160 në rrugën “Llambi Bonata”, zona e ish-Kombinatit”./ Opinion.al
