Bashkia Tiranë planifikon që të japë për përdorim me qira një sipërfaqe pyjore në zonën e Petrelës për agroturizëm, sipas një projekt vendimi për “Shprehjen e pëlqimit në parim për dhënien me qira të pasurisë me nr. 745 dhe 744/2 të llojit “Pyll” ndodhur në Njësinë Administrative, Petrelë”.
Sipas relacionit, me ndryshimet e fundit ligjore Bashkisë së Tiranës i është kaluar funksioni për administrimin, qeverisjen dhe mbrojtjen e fondit pyjor dhe kullotor brenda kufijve Administrativo- Territorial. Pyjet dhe kullotat publike janë transferuar në pronësi të Bashkisë së Tiranës.
Një udhëzim i Ministrisë së Mjedisit parashikon se sipërfaqet mund të jepen në përdorim vetëm për ushtrimin e veprimtarive të parashikuara në legjislacionin në fuqi për pyjet dhe kullotat të tilla si punë kërkimore studimore, mbarështim të florës dhe faunës, qëllime pushimi argëtimi, shëndetësore, veprimtari turistike, rehabilitim dhe pyllëzim etj. Veprimtaritë që do të ushtrohen të jenë në përputhje me planet e tyre te mbarështimit si dhe duhet te sjellin përmirësime te dukshme, te realizojnë investime, te mos cenojne vlerat dhe funksionet natyrore e biologjike.
Bashkia pranon se pranë saj janë depozituar kërkesa që shprehin interes të vazhdueshëm lidhur me përdorirmin e pasurive të llojit pyll të ndodhur në Njësinë Administrative, Petrelë, për pasurinë si më poshtë, sipas funksionit dhe destinacionit që kanë:
Pasuria nr. 745, vol um 3, faqe 85, Z.K. 3091, me lloj pasurie “Pyll”, ne pronesi te Shtetit.
Pasuria nr. 744/2 ne volum 4, faqe 149, Z.K. 3091, pasuri e llojit “Pyll”, ne pronesi te shtetit
Bashkia ka marrë një propozim të pakërkuar, që e ka vlerësuar pozitivisht, pasi sipas relacionit do të sjellë ndikim pozitiv social ekonomik. “Dhënia në përdorim me kundërshpërblim e këtyre pasurive sjell një impakt pozitiv social ekonomik, pasi rehabilitimi i sipërfaqeve pyjore, mirëmbajtja e tyre si dhe implementimi i planit te biznesit nga subjekti i cili do te lidhë kontratën me Bashkinë e Tiranës, do të sjellë rritjen e nivelit te punësimit të banoreve në zonën përkatëse”, thuhet në relacion.
Në relacion nuk jepen të dhëna se cili është subjekti që ka bërë propozimin e pakërkuar për të marrë në përdorim zonën pyjore të Petrelës.
