Në emisionin “Opinion” kryebashkiaku i Tiranës, Erion Veliaj tha se nëse merr nje mandat të dytë do të ndërtojë 17 shkolla të reja, siç tha ai për t’i dhënë fund pas 30 vitesh mësimit me dy turne në kryeqytet.
Kështu vetëm pak muaj përpara zgjedhjeve lokale, Bashkia e Tiranës hapi tenderin për ndërtimin e 4 shkollave me koncesion në kryeqytet.
Projekti parashikon ndërtimin e dy shkollave 9-vjeçare dhe dy gjimnazeve në zonën e “5 Majit”, Drejtorisë së Higjienës dhe në Njësinë Administrative Dajt, pranë rrugës “Sotic Caci”.
Operatori fitues do të ndërtojë këto godina me fondet e tij, dhe do të jetë përgjegjës për administrimin e tyre derisa Bashkia dhe Ministria e Arsimit të paguajnë gradualisht vlerën e koncesionit.
Sipas të dhënave në relacionin e projektbuxhetit, ndërtimi i 17 shkollave në kryeqytet do të ketë një kosto totale prej 10.1 miliardë lekësh.
Pagesat e para për këtë koncesion pritet të nisin vitin e ardhshëm, kur Bashkia e kryeqytetit do të paguajë 1 miliard lekë, ndërkohë që në vitet pasardhëse fatura do të vijë duke u rritur./Opinion.al
