Dy rivalë në dashuri pasi synojnë të njëjtën femër, Irinën, në dehje e sipër përfunduan në një puthje në buzë, në shfaqjen “Tri Motrat”, që hapi sezonin artistik për vitin 2016 në Teatrin Kombëtar.
Bëhet fjalë për baronin pozitiv që interpretohet nga Neritan Liçaj dhe impulsivit Saljoniji, duke realizuar kështu skenën e rrallë në teatrin shqiptar, që mund të konsiderohej dhe pika kulminante e veprës së Çehovit.
Dy artistët mjaft të talentuar, secili i veçantë në natyrën e tij kësaj here janë bërë bashkë për të thyer një tabu, duke sjellë atmosferën e burrërisë ruse në realitetin shqiptar. Edhe pse në Rusi puthja e dy meshkujve në buzë është traditë, për ne tingëllon paksa e çuditshme, por mënyra si e realizuan artistët nuk e krijoi aspak atë sikletin e rasteve të tilla.
Neritan-Licaj, Baroni, një ëndërrimtar dhe Saljoniji një djalë i ndrojtur por që bën të fortin u puthën në buzë, një gjetje origjinale kjo sipas filozofisë së bashkimit të dy të kundërtve që plotësojnë njëri-tjetrin. Edhe pse publiku çuditet paksa kur sheh këtë puthje skenike mes dy burrave, për dy aktorët është diçka e zakonshme, apo thjesht një çështje teknike.
Për t’i parë në këtë shfaqje ishin prezente dhe partneret e tyre në jetë, bashkëshortja e Neritanit, Holta dhe e dashura e Gertit, Helena. Siç është shprehur Neritani, bashkëshortja e kupton në profesionin e tij dhe asnjë skenë e tillë nuk i duket e jashtëzakonshme. Të dy aktorët janë shumë të dhënë pas partnereve pasi shpesh postojnë në rrjetet sociale foto duke u argëtuar me to.
Sa i takon shfaqjes “Tri Motrat” ata vijnë si burra të një kohe që na kthen shumë pas në histori. Në qendër të veprës së vënë në skenë nga regjisori Hervin Çuli janë tri motrat; Olga, Masha dhe Irina. Ngjarjet ndodhin në fillim të shekullit XX, në një fshat provincial, ku tri motrat Prozorov jetojnë së bashku me vëllain e tyre, Andrejin.
Olga, motra më e madhe është mësuese në një shkollë, Masha viktimë e një jete bashkëshortore të palumtur dhe Irina, e cila ëndërronte Moskën dhe për jetën në qytet. Për Irinën dhe Andrejin Moska ishte simbol i një jetese më të mirë dhe e më të bukur. Me vdekjen e babait të tyre familja kaloi në dorë të Andrejit, i cili shumë shpejt do te martohet me Natashën, një grua që kërkon të sundojë tri motrat e familjes Prozorov.
Jetesa pranë Natashës bëhet gjithnjë e më e vështirë për tri vajzat Prozorov. Tri motrat të palumtura nga jeta që bënin, ëndërronin pa fund të ktheheshin në Moskën e tyre të dashur. Andreji, humbi shtëpinë në bixhoz dhe Natasha i përzuri nga shtëpia tri motrat, të cilat endeshin rrugëve duke kuptuar se si vlerat njerëzore zhduken dita-ditës.
Një dramë midis dëshirës për t’u larguar drejt qytetit dhe midis ëndrrës për të mbajtur lart vlerat njerëzore prezantohet në veprën “Tri Motrat” të Çehovit, ku Neritani dhe Gert sollën rivalitetin e fortë mes dy meshkujve të dashuruar me të njëjtën femër./Story.al
