Bashkëpunimi Shqipëri–Kosovë për arsimin e lartë/Manastirliu: 30 bursa çdo vit për ata që duan të studiojnë në vendin tonë
Ministrja e Arsimit, Ogerta Manastirliu, ka bërë të ditur se sot në mbledhjen e qeverisë është miratuar projektligji për ratifikimin e marrëveshjes së bashkëpunimit me Kosovën në fushën e arsimit të lartë dhe bashkëpunimit në kërkimin shkencor.
Ministrja gjithashtu njoftoi vendimin për shkëmbimin e studentëve mes Kosovës dhe vendit tonë.
“30 bursa në vit për studentë që duan të studiojnë në Shqipëri në programe të ndryshme, do të ketë një komision vlerësimi. Një tjetër komponent është sa i përket njohjes së gradave dhe titujve shkencor, pritet lehtësimi i procedurave.
Mobiliteti i studentëve në të dy vendet është shumë i rëndësishëm. Nëpërmjet granteve që japim, inkurajojmë projekte të përbashkëta studimore, me qëllim që të vijojmë këtë bashkëpunim të suksesshëm”,-tha Manastirliu.
