Për kreun e Bindjes Demokratike, Astrit Patozi, zgjedhjet e parakohshme janë një domosdoshmëri në gjendjen aktuale, madje ai pranon se për këtë qëllim mund të bashkëpunojë edhe me Partinë Demokratike.
Në një intervistë për ABC News, Patozi tha se kriza është rezultat i sjelljes së mazhorancës dhe opozitës, ku nga njëra anë njëra ka ‘mbipeshë’ pushteti ndërsa tjetra ‘mungesën totale të gjitha pushteteve’. Zgjedhjet e parakohëshme sipas tij janë të domosdoshme por gjithashtu edhe një objektiv i përbashkët i forcave opozitare.
“Unë nuk përjashtoj dhe nuk paragjykoj askënd, sidomos një formacion i cili është opozitar po ashtu si Bindja Demokratike. Unë shpresoj, nuk dua të flas për një gjë që nuk ka ndodhur, për një gjë që është ende në kuadrin e një thashethemi, por ajo që ka rëndësi është që ne të konvergojmë, do doja që çdo formacion opozitar të jepte kontributin e tij në funksion të arritjes së objektivit që janë zgjedhjet e parakohshme. Nëse PD dhe çdo parti tjetër opozitare punon dhe e tregon që është në funksion të këtij qëllimi sigurisht që ne kemi të njëjtin objektiv dhe do të shikojmë të gjitha format e bashkëpunimit”, tha Patozi.
Megjithatë ai tha se nuk ndan të njëjtin qëndrim me kreun e PD-së, Lulzim Basha përsa i përket rolit të ndërkombëtarëve në zgjidhjen e krizës. Basha deklaroi dje nga se zgjidha e krizës do të vijë nga brenda e jo duke luajtur rolin e viktimës ndërkombëtarisht. Për kreun e BD prania e ndërkombëtarëve është e nevojshme.
“Sa më e rëndë që të jetë situata dhe e tillë është në Shqipëri, aq më shumë nevojë kemi për partnerët tanë ndërkombëtarë të cilët nuk kanë munguar në asnjë rast kur ne kemi pasur kriza. Deklaratat patetike të disa surrealistëve të vonuar apo që këtë funksion e ushtrojnë part time mua gjithmonë më kanë shkaktuar të qeshura sepse kujtoj seancën për reformën në drejtës në Kuvend ku u ngritën 140 kartona jeshilë dhe bashkë me Lulzim Bashën në llozhë bëheshin 141, kjo deviza e ndërtimit të demokracisë është një reminishencë e së shkuarës. Ne kemi shumë nevojë për praninë e ndërkombëtarëve, sidomos për situatën ku gjendemi sepse ne gjëmën më të madhe këtij vendi e kemi bërë kur kanë humbur pak vëmendjen ose kur na kanë lënë ne që ta zgjidhim vetë”, tha Patozi. /Opinion.al
