Gazetari Artan Hoxha deklaroi mbrëmjen e së enjtes se persona të rëndësishëm me imunitet kanë shkuar në paraburgim në Policinë e Durrësit për të takuar personin e arrestuar për trafik ndërkombëtar droge Durim Keçi.
Emrin e zyrtarit të lartë që ka qenë në komisariat e ka zbuluar sot lideri i PD, Lulzim Basha.
Në një deklaratë për mediat në përfundim të mbledhjes së grupit, ai u shpreh: “Nga informacionet tona personi që ka shkuar për të takuar Durim Keçin, dhe për të vënë në presion policinë është kryetari i Bashkisë së Durrësit, Vangjush Dako”.
Po kështu ka qenë edhe një deputet i PS-së, të cilit Basha nuk ia permendi emrin.
Durim Keçi është arrestuar javën e kaluar edhe pse ishte shpallur në kërkim prej kohësh nga Interpoli. Ai kërkohet nga drejtësia italiane për trafik ndërkombëtar droge. Basha ka deklaruar më herët se Policia kishte fshehur kërkesën e Interpolit, duke akuzuar se Keçi ka lidhje politike me PS e Durrësit. Madje Basha, të enjten e kaluar në “Opinion” publikoi foto të Keçit me ministrin e Ramës, Blendi Klosi. Po kështu të tjera foto u publikuan nga Monika Kryemadhi, ku Keçi mbante veshur në fushatë bluzën e PS.
Keçi ëshë dënuar nga Gjykata e Genovës, Itali me Vendimin Nr.SIEP 294/2013 dt.21.02.2014, me 9 vjet e 7 muaj e 22 ditë burg për veprat penale” Dhunë, kërcënim dhe nëpërkëmbje të autoriteteve gjyqësore”, ” Shkatërrim prone me pasoja të rënda”,
“Trafikim të lëndëve narkotike “,” Krime me armë kundër personit”, ” Pjesmarrje në organizatë kriminale me qëllim trafikimin e lëndëve narkotike” dhe” Shfrytëzim prostitucioni” parashikuar në nenet 338, 81, 342, 635/2 , 110, 73 dhe 416 të Kodit Penal Italian”.
/Opinion.al
