Lulzim Basha ka patur një takim në Bashkinë e Durrësit paraditen e së dielës. Kryetari i Partisë Demokratike është takuar me banorët e Manzës. Gjatë një bashkëbisedimi me ta, ai u ndal sërish te dorëheqja e Fatmir Xhafajt. Lideri i PD tha se ish Ministri i Brendshëm u largua nga posti i shkatërruar.
“Largimi i tij, ndryshe nga ç’përpiqet ta shesë propaganda e Rilindjes është rezultat i një dhe vetëm një faktori. Prej ditës së parë në atë karrige, kishte vetëm një merak; Si të shpëtonte të vëllain të dënuar për drogë. Dhe Fatmir Xhafaj i cili është larguar i shkatërruar. A keni dëgjuar të artikulojë një arsye se pse u dorëhoq nga detyra e Ministri të Brendshëm? E ka mbytur me terrin mediatik, me lloj lloj justifikimesh e barcaletash. Fatmir Xhafaj u largua nga frika e përballjes me përgjegjësinë e hetimit ndaj vartësve të tij, drejtorit të Përgjithshëm Ardi Veliut dhe njerëzit e tjerë që janë të përfshirë në manipulimin e dosjes. Një ministër që përfshihet në manpulimin e një dosjeje hetimore duhet të shkojë para drejtësisë, Fatmir Xhafaj u largua për t’i bërë bisht përgjegjësisë hetimit të dosjes së vëllait të tij, e cila u bë publike falë qëndresës së opozitës”, tha Basha.
Dosja për të cilën flet Lulzim Basha është ajo e Albert Veliut, i njohur ndryshe si Babalja. Opozita ka nxjerrë bllof dëshmitarin Alfred Veliu me një video ku ai tregon se si ishte manipuluar dhe i ishin ofruar para për të pranuar aktrimin e vëllait të Fatmir Xhafajt. Po ashtu Basha tha se Xhafaj nuk pati guximin të arrestonte kryebashkiakun e Durrësit, Vangjush Dakon./Opinion.al
