Kreu i opozitës Lulzim Basha ka folur në një intervistë për “Zërin e Amerikës” lidhur me votimin e përshpejtuar, ditën e nesërme në parlament, të ligjit të vettingut.
Sipas Bashës, votimi i përshpejtuar i vettingut, është në kundërshtim më Kushtetutën, pasi duhen respektuar afatet kushtetuese, të cilat nuk e lejojnë votimin nesër.
“Ky është një komunikim që unë e kam patur me partnerët amerikanë dhe europianë dhe do të ishte absurd që ata të mbështesnin nisjen e procesit të reformës në drejtësi duke shkelur kushtetutën e vendit, por PD ka shprehur gatishmërinë për të nisur punën me ekspertët për të shqyrtuar për draftin për Vettingun, në mënyrë që mos ketë asnjë vonesë në miratimin e ligjit.” -tha Basha
Basha pohoi gjithashtu se drafti i është vënë Partisë Demokratike në dispozicion mbrëmë vonë dhe jo në datën 4 Korrik, siç deklaroi Xhafa.
Këtë, Basha e cilësoi manovër politike e tipit që pengoi deri në çastin e fundit konsensusin me PD.
“Pretendohet që drafti ka qenë gati më 4 korrik, ndërkohë që drafti është përcjellë zyrtarisht mbrëmë natën e mbrëmshme në orën 22:30. Ne e kemi marrë në dorëzim dhe ekspertët po e shqyrtojnë dhe më pas do të procedohet sipas hapave të zakonshëm” .
