Kreu i Partisë Demokratike, Lulzim Basha ka deklaruar sot se një nga garancitë që opozita ka propozuar kundër shitblerjes së votës është aplikimi i sistemit elektronik.
Në një bashkëbisedim në Facebook, nën nismën “Po të dëgjoj”, Basha i është përgjigjur pyetjeve të qytetarëve në lidhje me projektin e tij qeverisës. Ndër të tjera kreu demokrat tha se opozita do të bëjë gjithçka që të realizohet votimi dhe numërimi elektronik por theksoi se kjo nuk është vetëm në dorën e tyre.
“Votimi elektronik dhe numërimi elektronik janë prioritetet e Partisë Demokratike dhe opozitës së bashkuar në tryezën e Reformës Zgjedhore. Janë një nga pikat e programit të punës. Ne kemi parë në dhjetor se si mund të ndërtohet një sistem për votimin elektronik relativisht brenda një kohe të shkurtër, një sistem i thjeshtë, i cili mund të mos e eleminojë, por do ta bëjë shumë më të vështirë procesin e shitblerjes së votës apo të identifikimit të mënyrës se si kanë votuar zgjedhësit. Pra do ta bëjë shumë më të lehtë për qytetarët që ta shprehin vullnetin e tyre pa u ndikuar nga paratë e pista apo nga krimi. Po, votimi elektronik, numërimi elektronik por edhe identifikimi biometrik, janë dhe mbeten prioritete për në në Reformën Zgjedhore. Ne duam dhe do të bëjmë gjithçka që në zgjedhjet e ardhshme të përdoret teknologjia dhe shqiptarët të votojnë në mënyrë sa më të sigurt. Natyrisht nuk varet vetëm nga ne. Pala tjetër duhet të bjerë dakord po kështu dhe e dyta, pala tjetër duhet të kishte nisur prej kohësh hapat për ta blerë këtë sistem, për ta testuar këtë sistem. Megjithatë më mirë vonë se kurrë. Ne do të bëjmë gjithçka që shqiptarët të votojnë me pajisje elektronike në zgjedhjet e ardhshme parlamentare dhe ato vendore në një ditë”, tha Basha. /Opinion.al
