PRISHTINE- Kryetari i Partisë Demokratike të Shqipërisë, Lulzim Basha ka deklaruar në Prishtinë se PD kërkon një Kosovë të fortë, një shtet të konsoliduar të së drejtës, demokraci funksionale dhe bashkim të gjithë energjive për rritjen e numrit të njohjeve dhe adresimin e prioriteteve të qytetarëve të Kosovës.
Basha gjatë vizitës së sotme në Kosovë, është takuar me krerët e pozitës, dhe me presidenten në largim, Atifete Jahjaga. Kurse, pasdite do t’i takojë përfaqësuesit e opozitës.
Pas një takimi me kryetarin e Kuvendit të Kosovës, Kadri Veseli, në një deklaratë për media Basha e Veseli kanë deklaruar se kanë diskutuar për situatën politike në Kosovë dhe në Shqipëri, si dhe për bashkëpunimin midis opozitë parlamentare në Shqipëri dhe formacioneve parlamentare në Kosovë.
Në kohën kur po mbahej takimi mes të dy këtyre liderëve, në po të njëjtën ndërtesë, opozita tentoi të pamundësojë mbajtjen e seancës së sotme, duke hedhur gaz lotsjellës.
Në pyetjen drejtuar Bashës se opozita në Shqipëri, a do ta marr për model hedhjen e gazit lotsjellës, ashtu si gjuajtjen me vezë, ai ka deklaruar se nuk do ta marrin për model, duke theksuar se gazi nuk është model për parlamentin.
Basha tha se opozita ka përgjegjësitë e veta për demokracinë dhe se opozita e Shqipërisë po bënë gjithçka për të realizuar përgjegjësit brenda kornizave të një shteti ligjor, e brenda të cilës kornizë është një hapësirë shumë e dobishme për luftën opozitare në Kosovë.
Megjithatë, Basha tha se debati, polemika, përplasja demokratike vetëm i shërben demokracisë, ndërsa ngërçi dhe dëmtimi i premisës për dialog nuk i shërben as demokracisë dhe as konsolidimit të shtetit të Kosovës, e cila është domosdoshmëri për Kosovën dhe për popullin shqiptar.
Basha gjatë kësaj vizite në Kosovë,pati edhe një mesazh për opozitën dhe për krerët e institucioneve të Kosovës. Mesazhi i tij ishte, i njëjti mesazh sikurse i Partisë Demokratike të Kosovë, ku kërkohen një Kosovë e fortë, dhe një shtet i konsolidua të së drejtës, dhe demokraci funksionale.
Adresimin e prioriteteve të qytetarëve të cilat kanë të bëjnë me ekonominë, me punësimin, luftën kundër varfërisë, luftën kundër krimit dhe korrupsioni, këto ishin pesë nga prioritetet që sipas Bashës mazhornaca dhe opozita duhet t’i marrin për bazë.
Me ardhjen e kryetarit të PDSH-së, partisë opozitare në Shqipëri, Lulzim Basha, kryetari i Kuvendit të Kosovës, Kadri Veseli, e ka mirëpritur, ku tha se një model si ky të merret shembull nga opozita në Kosovë.
Veseli në faljen e tij pas takimit me Bashën, tha se Kosova dhe Shqipëria nuk kanë çështje të ndara por çështje të cilat i bashkojnë. Ai theksoi se sfida e dy vendeve tona është synimi për të ecur përpara, përmirësimi ekonomik, dhe avancimet në integrimet ekonomike.
Në këtë takim Basha ka uruar Veselin për marrjen e detyrës së kryetarit të PDK-së. Ku ka shprehur bindjen se edhe nën drejtimin e tij marrëdhëniet midis PDK-së dhe PDSH-së do të forcohen e konsolidohen në interes të qytetarëve trë Kosovës dhe Shqipërisë, të cilat do të shërbejnë për interesat kombëtare.
Gjithashtu, ai ka uruar të parin e Kuvendit edhe për menaxhimin e situatës për zgjedhjen e presidentit të ri.
Pas këtyre takimeve, Basha u takua edhe me kryetarin e Prishtinës, Shpend Ahmeti. Kurse, pasdite do të takohet me liderët e opozitës. /KosovaPress
