Kur kanë mbetur edhe pak ditë nga zgjedhjet për kreun e Partisë Demokratike, Lulzim Basha, i cili është në kërkim të një tjetër mandati, ka intensifikuar takimet dhe sulmet kundrejt qeverisë.
Ai u ndal në Dibër, ku foli për dosjen e Arben Ahmetajt sipas së cilit është një tregues se duhet një paketë e re ligjore kundër krimit dhe korrupsionit qeveritar duke parashtruar 4 propozime për SPAK.
“Dosja e Ahmetajt, ku shfaqej se si qeveria vepronte si organizatë kriminale, tregoi dhe njëherë se duhet një paketë ligjore radikale kundër krimit dhe korrupsionit qeveritar, duke i hequr çdo pengesë dhe dhënë mbështetje të pakushtëzuar SPAK, duke nisur me: Hetimi i mashtrimeve me kontratat dhe fondet publike; Hetimi pa asnjë përjashtim i kontratave koncesionare; Hetimi i pasurive të çdokujt që është përfshirë në hartimin, miratimin dhe përfitimin e kontratave koncesionare, nga juristi i thjeshtë deri tek kryeministri; Paratë që u janë vjedhur shqiptarëve dhe kanë përfunduar në llogari bankare, apo janë investuar kudo nëpër botë, duhet t’u kthehen shqiptarëve. Ajo që i dhemb më shumë botës së krimit dhe të korruptuarve është sekuestrimi i pasurive”,-shprehet Basha.
Ish kryedemokrati ka risjellë edhe njëherë në vëmendje propozimet e bëra që në krye të herës, në kuadër të asaj që ai e quan si mënyra e duhur për të çliruar ekonominë e vendit dhe për të bërë ndryshimin e pritur nga shqiptarët.
“Aleanca Qytetare për Demokracinë do të jetë koalicioni ynë për të çliruar ekonominë dhe për të çuar përpara ndryshimet që presin shqiptarët duke mundësuar: Listat e hapura; Vetting-un e politikanëve; Votën e diasporës; Kufizimin e mandatetev; Zgjedhjen e Presidentit nga populli. Ne do të përkushtojmë çdo energji në hapjen, fuqizimin dhe modernizimin e strukturave të Partisë Demokratike. Ky është misioni i ri i Partisë tonë! Një parti që reflekton kohën, shoqërinë dhe nevojat e saj, që respekton kontributet, garanton karrierën, forcon meritokracinë, e hapur ndaj të rinjve dhe mendimeve të reja. Ky është modeli që duhet t’u japim shqiptarëve, si shembull i ndryshimit që do ndërmarrim për Shqipërinë”,-thotë Basha.
Zgjedhjet për kreun e PD do të mbahen në 29 korrik dhe në këtë garë, Basha ka përballë Gjergj Hanin.
