Lideri demokrat Lulzim Basha i cili po merr pjesë në punimet e Kongresit të CDU-së në Essen të Gjermanisë është takuar edhe me Kancelaren Angela Merkel. Ky takim vjen dy javë pasi Merkel takoi Kryeministrin Edi Rama. Ai ka dhënë një intervistë për ABC Neës ku është shprehur se kam falenderuar Merkelin për ndihmën që i ka dhënë Shqipërisë. “Dua t’i siguroj të gjithë shqiptarët se Kancelarja Merkel do të mbështesë pa asnjë lëkundje Shqipërinë dhe gjithë shqiptarët në këto sfida të jashtëzakonshme, në veçanti sa i përket luftës kundër krimit dhe korrupsionit, dhe garantimin e zgjedhjeve të lira dhe të ndershme”, tha Basha.
Më tej gazetarja e ka pyetur për konkluzionet e shteteve anëtare.
Pyetje: Ka më shumë se pesë kritere për tu përmbushur nga Shqipëria për hapjen e negociatave të anëtarësimit, ndërkohë në takimin e “Miqve të Shqipërisë”, kryeministri Rama tha që negociatat janë hapur dhe ishte vetem kushti i Vetting-ut nëse mund të konsiderohet i tillë, duke konsideruar gjithashtu se zgjedhjet janë thjesht një përrallë për një fëmijë. Ç’mendoni për këtë?
Basha u përgjigj se “në Bruksel, në Berlin, në Tiranë që z.Rama gënjeu. Gënjeu sepse nuk do të pranojë për përgjegjësinë që ka në moszbatimin e ligjit të dekriminalizimit, për largimin e kriminelëve nga Parlamenti, nga bashkitë”.
Sipas Bashës, disa prej këtyre vendimeve Rama mund ti marrë vetë siç është largimi i Elvis Rroshit. “Ai zgjedh të mos e marrë këtë vendim. Dhe kur pyetet nga partnerët pretendon se problemi nuk ekziston. E njëjta gjë edhe për zgjedhjet e lira dhe të ndershme, z.Rama ka prej Majit që bllokon reformën zgjedhore. E njëjta gjë për problemin e drogës që z.Rama e refuzon, e përqesh apo e minimizon, por vendet anëtare, shtetet e Bashkimit Europian, shtetet serioze kanë të gjithë informacionin në dispozicion. Dhe këtu në Bruksel dhe në Berlin, Partia Demokratike dhe unë kemi marrë përgjegjësitë sot si opozitë dhe nesër si qeverisje për ti trajtuar këto probleme të rënda për Shqipërinë dhe shqiptarët, jo vetëm për BE, me seriozitet dhe për ti zgjidhur ato”, u shpreh Basha.
