Kryetari i Partisë Demokratike, Lulzim Basha zhvilloi një takim me bashkë-raporterët e Komisionit të Monitorimit të Asamblesë Parlamentare të Këshillit të Europës, Andrej Hunko dhe Joseph O’Reilly.
Në takim me bashkë-raporterët, Basha është shprehur se lidhja e krimit me politikën, paraja e siguruar nga trafiqet, krimi dhe korrupsioni po shkatërrojnë procesin politik në Shqipëri.
“Në mënyrë të qëllimshme, Rama ka vonuar dhe bërë të pamundur reformën zgjedhore tashmë që pas një muaji fillojnë përgatitjet zgjedhore. Në këto kushte, standardet e zgjedhjeve demokratike dhe legjitimiteti i zgjedhjeve do cenohen rëndë”, është shprehur kreu i PD, Lulzim Basha.
Sipas kreut të opozitës, nëse nuk zbatohet ligji i dekriminalizimit dhe nuk ndërmerren veprime energjike, nën presion ndërkombëtar, për ndalimin e kultivimit dhe trafikimit të kanabisit është e pamundur që vitin e ardhshëm të zhvillohen zgjedhje.
