Duke nisur nga shtatori opozita do të vazhdojë me protesta edhe më të fuqishme tha sot në deklaratën e tij për mediat kreu i opozitës Lulzim Basha.
“Opozita do të vazhdojë protestat në shtator. Përveç protestave që do të jenë edhe më të mëdha, edhe më të fuqishme, në një situatë edhe më të papranueshme. Paralelisht me këto do të fokusohemi më shumë për zgjidhjet që do t’u ofrojmë shqiptarëve” deklaroi Basha.
Partia Demokratike siç tha Basha po punon për të arritur në një marrëveshje me të gjitha grupet e interesit, biznesin e vogël dhe fermerët për të arritur në një zgjidhje të problemeve të përditshmërisë. Ndërsa në rrafshin e dytë të ofrimit të zgjidhjes për qytetarët Basha nënvizoi punën për platformën “Për Shqipërinë si gjithë Europa”.
“Opozita e bashkuar sëbashku me Partinë Demokratike janë gati që sëbashku me shumicën dërrmuese të qytetarëve shqiptarë, përfshi edhe socialistët e ndershëm, të dëshmojnë kapacitetet dhe vendosmërinë tonë për ti dhënë fund problemet të cilat kanë bllokuar persperktivën evropiane të Shqipërisë” deklaroi kreu i demokratëve Basha.
Sa i përket mundësisë së një ndërmjetësimi nga ana e partnerëve gjerman për zgjidhjen e krizës, Basha vlerësoi përpjekjet e tyre për të nxitur Shqipërinë drejt BE.
“Vlerësojmë rolin e tyre, vëmendjen e tyre dhe rolin e interesin dhe ndihmën që Gjermania po japin për të mundësuar që Shqipëria të mos mbetet prapa, peng i krimit dhe korrupsionit, por të ecë drejt integrimit në BE. Pa diskutim që vendi do të shkojë drejt BE duke u sjellë si një shoqëri europiane, si politikë europiane. Pengesa kryesore për këtë sot është kapja e politikës dhe institucioneve nga një grup i strukturuar kriminal me në krye Edi Ramën” deklaroi Basha.
Gjatë paradites të së martës, Basha u takua me nënkryetaren e grupit parlamentar për Europën CDU/CSU në Gjermani, Katja Leikert, por edhe me ambasadorin austriak Johann Sattler. Ai theksoi se komunikimi me partnerët është intensiv por nuk dha detaje se çfarë ishte biseduar në këto takime. /Opinion.al
