Ka përfunduar takimi mes kreut të Kuvendit Ilir Meta dhe liderit të opozitës Lulzim Basha në mjediset e hotel “Rogner”, në lidhje me gjetjen e konsensusit për reformën në drejtësi.
Kryetari i Partisë Demokratike ka bërë të ditur se Kryeministri Edi Rama ka prishur marrëveshjen e arritur dje në Kryesinë e Kuvendit gjatë takimit Rama-Basha-Meta për reformën në drejtësi.
Duke folur jashtë ambienteve të Rogner, kreu i PD shtoi, që nëser kjo çështje nuk zgjidhet as sot, ai së bashku me Ilir Meta do ta zgjidhin në Bruksel. Prishja e marrëveshjes, deklaroi Basha, tregon se kush nuk e do konsensusin për reformën.
“Është prishur marrëveshja e rënë dakort me një qellim, për të shmangur konsensusin në Parlament. Sot dua të falenderoj kryetarin e Kuvendit për rolin konstruktiv. Kanë dalë qartë petët e lakrorit kush e do dhe kush nuk e do konsensusin. PD ka votat gati për të votuar më 21 korrik në parim draftin kushtetues dhe pas rakordimit për 7 ligjet, votimin nen për nen për të gjitha çështje. Nëse nuk zgjidhet sot, i kam bëerë thirrje kryetarit të Kuvendit ta zgjidhim në Bruksel për të shpartalluar komplotin e Ramës ndaj reformës”, tha kryetari i PD Lulzim Basha.
