Kryetari i Partisë Demokratike, Lulzim Basha , ka zhvilluar ditën e sotme një takim me strukturat e kësaj partie në Shijak. Kreu i selisë blu, tha gjatë fjalës së tij se opozit ka nisur një betejë në interes të qytetarëve, për të garantuar zgjedhje të lira dhe të ndershme.
“Djegia e mandateve ktheu besimin e qytetarëve se kjo betejë nuk është një betejë si të tjerat, nuk është, siç përpiqet ta paraqesë Rama, një betejë mes partive politike. Jo! Kjo është betejë për t’i kthyer çdo shqiptari liritë, mundësinë, demokracinë. Kjo është një betejë në të cilën ne dorëzuam pushtet. Nuk shkuam për të marrë pushtet, por dorëzuam karriget, mandatet tona, imunitetin tonë, privilegjet tona për t’u rreshtuar krah për krah me qytetarët.”-tha Basha
Teksa përsëriti problemet të cilat u deklaruan nga raporti ODIHR-it, kryedemokrati i u shpreh se 30 qershori ishte në interes të kryeministrit Edi Rama dhe jo të qytetarëve. Ai shtoi se Rama së bashku më miqte tij po plaçkitë vendin përmes PPP-ve, tenderave dhe koncesioneve.
“Refuzimi i farsës së 30 Qershorit është edhe refuzimi i regjimit të Edi Ramës. Më 30 Qershor 85 % e shqiptarëve konfiguruan përmasat e shumicës së re në vend, shumicës “Rama ik”, me në krye Partinë Demokratike. Plaçkit buxhetin, plaçkit taksat, plaçkit prokurimet publike, koncesionet, PPP-të, tenderat, plaçkit bregdetin, pyjet, malet, minierat, naftën. Të gjitha janë plaçkitje dhe grabitje e hapur. Plaçkitje është Teatri Kombëtar, plaçkitje është Stadiumi Kombëtar, plaçkitje është Unaza e Re, plaçkitje është Milot-Balldreni, 10-fish i çmimit të një autostrade në Evropë, në popullin më të varfër të Evropës”, theksoi Basha./ Opinion.al E.Xh.
