Lulzim Basha takoi demokratë të Patosit, Roskovecit, Fierit, Mallakastrës dhe Lushnjes gjate fushates për kryetar partie. Basha tha se 25 qershori nuk reflekton vullnetin e qytetarëve, por ishte një deformim, i prodhuar nga blerja e votës. Lulzim Basha pranon se kur ai hyri në fushatë, pra pas marrëveshjes së 25 Majit, Rama e kishte mbaruar fushatën dhe i kishte blerë votat. Ai e pranon këtë fakt sot pasi humbi, por nuk shpjegon se bëri marrëveshjen me Ramën kur e dinte se gjithçka do ishte në favor të së majtës.
Lulzim Basha:“Nisja e fushatës elektorale për formacionin tonë politik, në fakt ishte fundi i fushatës elektorale për kundërshtarët tanë. Një javë para se demokratët të ishin në terren në një fushatë qytetare, demokratike, europiane, duke shpalosur platformë, një plan për të nxjerrë vendin nga kriza ekonomike, alternativë për të gjithë kategoritë e njerëzve që vuajnë këtë krizë ekonomike; kundërshtari kishte mbyllur punën. Jo me plan, as me platformë, as me alternativë, por ashtu siç di të mbyllë punë; Me pagesa të majme duke nisur nga votuesit e vet, ata që nuk i ka sistemuar dot me favore e me punë në administratë, duke vazhduar me mbledhjen e kartave të identitetit tek ata që dyshohen si mbështetës të opozitës, me përdorimin në masë të administratës së shtetit dhe favoreve, me përdorimin e parave të derdhura lumë nga trafiku i drogës, me kërcënime jo vetëm të votuesve demokratë por edhe të familjarëve të tyre, më të gjitha format dhe mënyrat për të tjetërsuar vullnetin e qytetarëve”.
Më tej ai ironizoi sondazhet që ka hapur kryeministri në facebook.
“Edi Rama ka hapur sondazh se çfarë duan shqiptarët nga qeverisja e tij. Hipokrizia e kësaj është përtej çdo përfytyrimi. Eshtë e qartë për çdo shqiptar se Edi Rama nuk ka as program, as plan për të qeverisur Shqipërinë. Eshtë e qartë se kjo maxhorancë është fiktive dhe nuk përfaqëson vullnetin e qytetarëve por përfaqëson shtrembërimin e këtij vullneti përmes shit-blerjes së votës që u faktua në këto zgjedhje si varrmihësi i demokracisë tonë të brishtë”, përfundoi ai.
/Opinion.al
