Lulzim Basha ka zhvilluar sot takimin e radhës me të rinjtë kë kuadër të “Rrugëtimit për Shqipërinë”. Nga Shkodra ai deklaroi se “ajo që po përjetojmë sot nuk krahasohet as me periudhën më të errët të staniacionit”.
Sipas kreut të opozitës, gjendja e korrupsionit është edhe më keq se në vitin 2005.
“Raporti i Bankës Botërore thotë se korrupsioni është dyfishuar krahasuar me vitin 2013 dhe është më keq se në vitin 2005”, tha kreu demokrat
Megjithatë Basha shtoi se “plaga më e madhe është ajo e emigracionit të rinisë”.
“Po ikin nxënësit dhe po boshatisen shkollat. Mësova se në Vukatanë brenda një nate kishin ikur 30 të rinj. Koha të bëhemi bashkë për t’i dhënë zgjidhje problemeve dhe pastaj të vëmë në jetë këto zgjidhje. Të kthejmë votën e lirë. Të kthejmë shpresën. Kemi gjithçka që duhet, duhet vetëm një qeveri që punon për mirëqenie. Shqipëria i ka mundësitë që t’i japë fund krizës, për këtë duhet ta çojmë këtë rrugë deri në fund”, theksoi Basha.
Ai i bëri apel të rinjve se “modeli i qeverisjes me kriminelë është modeli që duhet të rrëzojmë dhe të ndërtojmë një model normal europian”.
Ashtu si në takimet paraardhëse, Basha premtoi se “paratë e kontratave të konçensioneve abuzive do të shkojnë për rimbursimin e studimit të studentëve”.
“Po punojmë me ekspertët më të mirë gjerman të CDU në qeveri, që të hartojmë një plan që garanton arsim dhe punësim për rininë”, deklaroi Basha. /Opinion.al
