Teksa Kuvendi është mbledhur sot për votimin e ndryshimeve në Kodin Zgjedhor, kryetari i Partisë Demokratike, Lulzim Basha është shprehur se opozita do kontestojë çdo ndryshim pasi janë antikushtetuese.
Këtë deklaratë kreu i opozitës e bëri gjatë në një takim me bizneset në rrugën “Myslym Shyri” në Tiranë. Ndër të tjera Basha tha se nuk ka asnjë formulë që mund ta shpëtojë kryeministrin Edi Rama nga humbja e zgjedhjeve të ardhshme.
“Shkatërrimi i institucioneve të Shqipërisë është arsyeja pse kjo bandë e ka katandisur kështu vendin. Hapat që merren sot janë thellësisht antikushtetues. Analizën e kanë bërë ekspertët e PD, por ky është tmerri dhe frika e Ramës nga procesi zgjedhor. S’ka formulë që e shpëton nga votimi popullor sikur vetëm nga premtimet e pa mbajtura ai do largohet me votë plebishitare nga shqiptarët. Do kontestohet çdo hap antikushtetues si ky i sotmi që është në kundërshtim me 5 qershorin dhe standardet e OSBE, por s’ka formulë që e shpëton këtë bandë që e cilëson Shqipërinë si çifligun e saj. Ju lus mbajeni mendjen tek ekonomia, te shqiptarët që sot do e shtrojnë vaktin e radhës vetëm me bukë. Kjo është emergjenca kombëtare, hajdutët s’ka gjë që i shpëton”,- tha Basha./ Opinion.al
