Gjatë vizitës një javë më parë në Slloveni, kreu i opozitës Lulzim Basha ka dhënë një intervistë për gazetën “Delo”. Aty ai flet për situatën politike në vend ku ka theksuar edhe njëherë se qëllimi i opozitës janë zgjedhjet e lira e të ndershme në vend, ndërsa shton se, sipas tij Shqipëria mund të shpëtojë vetëm me një demokraci Europiane.
“Shqipëria duhet të ndryshojë që nga themeli, që nga organizimi i saj juridik. Drejtësia nuk mund të mbetet më në dëshirat e qeverive, ligjin nuk duhet të jetë monopol i të fortëve dhe të pasurve, por shqiptarët duhet të kenë akses të barabartë në sistemin e drejtësisë. Prej më shumë se një viti vendi s’ka Gjykatë Kushtetuese. Në Shqipëri mbizotërojnë klane të krimit të organizuar, që i kanë shtrirë lidhjet e tyre që nga Amerika Latine, Amerika e Veriut, Azia e deri në zemër të Europës. Dhe në vend që të ndiqen, të arrestohen, të vihen para drejtësisë kriminelët, këta po fitojnë gjithmonë e më shumë ndikim politik, për shkak të lidhjeve me politikën duke i zgjeruar edhe më tej “bizneset” e tyre”. Prandaj synojmë, që në këtë ndryshim t’i përfshijmë të gjithë ata që kërkojnë të ndjekim ëndrrën europiane dhe që fuqia e vendimmarrjes t’i kalojë qytetarëve. Kjo do të bëhet duke inkurajuar gjithnjë e më shumë konkurrencën, si dhe njerëzit me ide”, ka thënë Basha në intervistë.
Në lidhje me krimin, Lulzim Basha është shprehur se prej Partisë Demokratike është miratuar ligji i dekriminalizimit që ka nxjerrë nga Parlamenti dhe administrata shtetërore shumë persona me precedentë penalë. Por përse krimi zgjedh Shqipërinë?
“Krimi shkon gjithmonë atje ku institucionet publike janë të dobëta dhe ku politika është e gatshme të sakrifikojë të mirat publike për interesat personale. Aty ku drejtuesit nuk mendojnë për investime në arsim e shëndetësi, por mundohen të kenë kontroll total mbi shtetin, policinë dhe gjyqësorin. Prandaj, duhet të investohemi shumë në forcimin e institucioneve shteterore dhe inkurajimin e konkurrencës politike”, është shprehur Basha.
Në lidhje me zgjedhjet Europiane dhe anëtarësimin e Shqipërisë, Basha ka thënë: “Është e rëndësishme që BE t’i mbetet besnik Samitit të Selanikut mbi perspektivën evropiane të Ballkanit Perëndimor. Por, gjithsesi, e rëndësishme është që të përqendrohemi tek vetja jonë, tek plotësimi i kritereve për anëtarësim, në mënyrë që të rinjtë tanë, me ide në ekonomi, kulturë e arsim, t’i realizojnë në vendin tonë e jo të detyrohen të emigrojnë në shumicë, siç ndodh aktualisht. Unë jam i bindur se në momentin që do të arrijmë që të ndërtojmë Europën në shtëpinë tonë, do të arrijmë të kemi mbështetjen e vendeve anëtare të BE për të ecur me shpejtësi në rrugën jo të lehtë të antarsimit.”
Lideri demokrat është pyetur edhe për situatën e emigrantëve sot në Europë, ku ka thënë se retorika ksenofobe nuk i shërben askujt. Në lidhje me konceptin e “Shqipërisë së Madhe”, Basha ka thënë se bashkimi mund të bëhet vetëm në BE./Opinion.al
