Kreu i Partisë Demokratike, Lulzim Basha, ka vijuar që të shikoj nga afër dëmet që shkaktoi tërmeti i së martës, i cili la pas dhjetëra viktima dhe qindra të plagosur.
Përmes një reagimi në rrjetet sociale, Basha shprehet se në njësinë 6 të Tiranës ka qindra banesa të shkatërruara e të pa banueshme, ndërsa banorët kanë nevojë për strehim dhe ushqim.
Kryedemokrati deklaron se qytetarët janë tërësisht jashtë vëmendjes dhe të braktisur në fatin e tyre. Po ashtu, lideri i opozitës, shprehet se ndihmat e ardhura nga Kosova për këtë zonë janë ndaluar në Kashar dhe nuk kanë arritur në destinacion.
Postimi i Bashës
Sot në njësinë administrative 6 në Tiranë, qindra banesa të shkatërruara dhe të pabanueshme. Mes vuajtjeve, stresit dhe tronditjes banorët kërkojnë vlerësim urgjent, strehim dhe ndihma ushqimore! Ata thonë se deri tani janë tërësisht jashtë vëmendjes dhe të braktisur në fatin e tyre.
Mirënjohje për kontributet dhe ndihmën e disa bizneseve që ndonëse në vështirësi kanë strehuar 40 familje. Ndërkohë u informova se ndihma të tjera të destinuara nga Kosova për këtë zonë janë ndalur në Kashar dhe nuk kanë arritur në destinacion. Gjithsesi vullnetarizmi nuk mjafton. Duhet menjëherë prania dhe ndihma e shtetit!/ Opinion.al
