Kryetari i PD-së Lulzim Basha ka vazhduar takimet me strukturat e partisë në rrethe, duke u ndaluar në Korçë, gjatë fundjavës. Basha është shprehur se “zbatimi i ligjit të dekriminalizimit dhe largimi i Edi Ramës janë themeli i garantimit të zgjedhjeve të lira dhe të ndershme”.
Sipas liderit demokrat, Rama nuk ka mbajtur asnjë premtim. “Nuk mund të përballet me qytetarët në zgjedhje të lira dhe të ndershme, prandaj është kundër votimit dhe numërimit elektronik dhe shpreson se me presionin e krimit dhe paratë e drogës dhe korrupsionit të deformojë vullnetin e zgjedhësve”, tha ai gjatë takimit me strukturat e PD në qytetin juglindor.
Basha shtoi se “mazhoranca ka bërë një investim të madh tek droga, tek krimi dhe duan që përmes drogës dhe krimit të diktojnë zgjedhjet e ardhshme. Këtë tashmë s’ua thonë vetëm demokratët, s’ua thonë vetëm shqiptarët por ua thotë e gjithë bota”. Ai iu referua një shkrimi në gazetën e Kongresit Amerikan që thotë se Rama e ka mbushur Shqipërinë me drogë me qëllim që të diktojë përmes drogës zgjedhjet e ardhshme.
Më tej, gjatë takimit, u prezantua një i ri, Kleanth Çaushi që tha se jam zhgënyer nga FRESSH dhe dua të kaloj tek PD-ja.
