Lulzim Basha e ka bërë sërish të qartë se Partia Demokratike nuk do të tërhiqet nga zbatimi i plotë i rekomandimit 88 të Komisionit të Venecias, sa i përket Reformës në Drejtësi. Pas mbledhjes së përjavshme të Grupit Parlamentar, kreu i demokratëve, Basha i ftoi kundërshtarët e tij politikë që të ndalin luftën verbale, po t’u japin shqiptarëve reformën që meritojnë.
Të njëjtin qëndrim, Lulzim Basha tha se kishte mbajtur edhe në takimin që pati më herët me Kryetarin e Komisionit për Çështjet e Integrimit në parlamentin gjerman, Gunther Krichbaum.
Ai u shpreh se kishte garantuar zotin Krishbaum për angazhimin absolut të Partisë Demokratike për të pranuar çdo zgjidhje që ndan palët, për krijimin e katër institucioneve të reja të drejtësisë, me kushtin e vetëm, zbatimin tërësor të Komisionit të Venecias.
E ndërsa kreu i opozitës e sheh pengesën tek Kryeministri Rama, Ambasadori amerikan Donald Lu përgjegjësinë për mos arritjen e një konsensusi për Refomën në Drejtësi e sheh tek vetë Basha. I pyetur nga Televizioni Klan në lidhje me deklaratën e zotit Lu, Lulzim Basha refuzoi t’i përgjigjet.
