Në mitingun përmbyllës së PS-së në Dibër, Kryeministri Edi Rama tha se kandidati socialist, Muharrem Rama i njeh problemet e zonës, ndërkohë që kandidati i PD-së, Sherefedin Shehu është i ardhur nga Tirana për llogari të Berishës.
Rama premtoi sërish ndërtimin e rrugës së Arbrit ndërkohë që tha se në tre vitet e kaluara duhej të paguante borxhet e lënë nga qeveria “Berisha”. “Pasi unë u thashë shumë ndershmërisht pse është vonuar rruga e Arbrit dhe po aq ndershmërisht u zotova se jemi ne që do ta ndërtojmë, kreu i PDsë doli dhe tha: “ne rrugën e Arbrit e lamë gati”.
Që Rrugën e Arbrit nuk e kanë lënë gati nuk ka nevojë t’ua them ju se e shihni që rrugë gati aty nuk ka. Para se të thotë që la gati rrugën e Arbrit, kryetari i PDsë ka për detyrë të thotë një rrugë që PDja la gati. Edhe investimin më të madh që bëri për rrugën e Kombit, nuk është e përfunduar dhe po e përfundojmë ne”, tha Rama. Një pjesë të fjalimit të tij, Rama ia kushtoi kandidatit demokrat, Sheferedin Shehu. “E kam dëgjuar kandidatin e PD të thotë do tua bëj tarifat 0 biznesit të vogël. Në fakt nuk thotë dot do e bëj taksën 0 se e kemi bërë ne. Tarifat janë për pastrimin, gjelbërimin dhe ndriçimin. Në qoftë se për këto askush nuk do ta paguajë, si do ta pastrojë, gjelbërojë dhe ndriçojë Shero Dibrën?
Shero e ka një përgjigje që të çarmatos: me vizion. Dhe që ta plotësojë këtë thotë: me vizion dhe me mbështetjen e Kryeministrit Basha. E dini çfarë do të thotë kjo? “Prit gomar të mbijë bar””, tha Rama. Sipas tij “mu kujtua edhe stadiumi që do ndërtojë Shero me vizion dhe me mbështetjen e kryeministrit Basha. Janë njerëz që nuk kanë shkuar kurrë në stadium, por e dinë që ka një skuadër këtu që po rritet. Nuk mund tu them unë dot ju që ne kemi bërë ndonjë mrekulli për Dibrën”.
Kryeministri premtoi zhvillim të Dibrës me kandidatin e majtë, kurse për rivalin, theksoi se me vizionin e tij, nuk do shohin asgjë. “Se ça dinë të bëjnë ata, këtu i kishit e keni parë, se ça dimë të bëjmë ne keni filluar ta shikoni, por akoma s’keni parë gjë, më pëlqen shumë kjo fjalë, se i mërzit shumë ata të PD. Nëse do zgjidhni Sheron ta gëzoni, me Sheron, pa Sheron ne Rrugën e Arbrit do e ndërtojmë, por me vizionin e Sheros ju s’do shihni në Dibër asgjë përvec Sheros, edhe atë do e shihni për ditë jave se fundjavën do e bëjë në Tiranë me gruan dhe familjen. Unë për vete, Sheron as magazinier nuk do ta zgjidhja” tha Rama.
