Partia Demokratike do të marrë pjesë në zgjedhjet e përgjithshme të 18 Qershorit 2017. Kështu ka deklaruar kryetari i saj, Lulzim Basha gjatë një takimi me kryetarët dhe sekretarët e degëve PD. Ai hodhi poshtë të gjithë variantet e dhëna në media se PD mund të bojkotojë zgjedhjet nëse nuk plotësohet kërkesa për numërimin elektronik të votave.
Basha garantoi se gjithë kandidatët për deputet do të zgjidhen në bazën e partisë dhe do të jenë njerëz me integritet në zonat e tyre. Sipas tij, PD-ja do ta bëjë vetë Vetingun e kandidatëve.
“Çdo kandidat për deputet i Partisë Demokratike do t’i nënshtrohet një procesi kontrolli të imtësishëm të integritetit të figurës. Ne kemi ngritur strukturat e posaçme për këtë si parti. Jemi e para parti që kemi ngritur komisionin tonë të integritetit dhe të etikës i cili tashmë është i pajisur me ekspertizën më të mirë, me njerëzit më të ndershëm, me mbështetjen ndërkombëtare, dhe ka hartuar praktikat më të avancuara bashkëkohore, për të mundësuar që lista e ardhshme e deputetëve të Partisë Demokratike, nuk ka asnjë surprizë në kuptimin e pastërtisë morale të figurave me të cilat shqiptarët do të përfaqësohet përmes Partisë Demokratike në Parlament”, tha lideri demokrat.
Lidhur me afatet ai deklaroi se “brenda datës 15 Shkurt, anëtarët e Partisë Demokratike do të angazhohen në një proces të hapur e qytetar me grupet e interesit për të propozuar kandidatët më të mirë për t’i përfaqësuar në Parlament”.
Ndërsa në lidhje me kërkesat e opozitës për reformën zgjedhore Basha u shpreh se “votimi dhe numërimi elektronik është fundi i kontestimit të zgjedhjeve mbi bazën e shitblerjes së votës, apo manipulimit të votës, apo futjes së duarve në kutitë e votimit. Zgjedhje të lira e të ndershme, kjo është fushata në të cilën Partia Demokratike dhe opozita do të angazhohen fuqimisht”, theksoi ai. /Opinion.al
