Kreu i Partisë Demokratike, Lulzim Basha ka kërkuar sot që të ndërmerret një plan i detajuar masash për parandalimin e përhapjes së koronavirusit.
Në një status në Facebook, Basha shkruan se rritja e numrit të viktimave kërkon përgjigje nga qeveria. Ai propozon tre masa konkrete.
Sipas Bashës qeveria duhet të shpallë gjendjen e fatkeqësisë natyrore në të gjithë territorin e Shqipërisë dhe të mbyllë call centerat, fasoneritë dhe sipërmarrjet me numër të lartë punonjësish.
Së dyti kreu demokrat kërkon hartimin e një plani për mënyrën e operimit të bizneseve që do të qëndrojnë hapur gjatë kësaj periudhe.
Së fundi ai kërkon që qeveria ti garantojë kushtet jetike qytetarëve që e kanë të pamundur të punojnë si pasojë e kësaj krize dhe që nuk përballojnë dot nevojat.
Reagimi i plotë i Lulzim Bashës
Shifrat e të prekurve nga COVID 19 po rriten. Prandaj shtohet nevoja për të ndërmarrë një plan të detajuar masash për parandalimin e përhapjes së shpejtë të virusit. Pa u bërë tepër vonë duhet vepruar për ti dalë të keqes përpara.
Duhen marrë masa të menjëhershme:
1.Të shpallet gjendja e fatkeqësisë natyrore në të gjithë territorin e Republikës së Shqipërisë. Të mbyllen call centers, fasoneritë dhe sipërmarrjet e tjera me numër të madh punonjësish në një hapësirë të mbyllur që kanë probabilitet të lartë për të përhapur virusin.
2.Të hartohet një plan masash i detajuar dhe me afate të mirëpërcaktuara për mënyrën e operimit të bizneseve që janë të domosdoshme për jetën e qytetarëve.
3.Marrjen e masave të menjëhershme diktuar nga gjendja e jashtëzakonshme për të garantuar kushtet jetike për të gjithë qytetarët që për shkak të pamundësisë për të punuar nuk përballojnë nevojat e përditshme.
Ne duhet të bëjmë gjithçka për ta kaluar me sa më pak dhimbje këtë situatë të vështirë. Qytetarët duhet të vazhdojnë të qëndrojnë në shtëpi ndërsa qeveria duhet t’u japë siguri për të përballuar jetesën e tyre. /Opinion.al
