Kryetari i Partisë Demokratike, Lulzim Basha ka zhvilluar ditën e sotme një takim me strukturat e kësaj partie në Maliq.
Gjatë fjalës së tij, Basha ka hedhur akuza ndaj kryeministrit Edi Rama, duke u shprehur se ai është përgjegjës për rritjen e papunësisë dhe varfërisë në vend.
Kreu i PD, tha se Rama po varfëron çdo ditë qytetarët shqiptar përmes vjedhjes dhe abuzimin me pushtetin.
Po ashtu, kryedemokrati foli dhe për zgjedhjet e 30 qershorit, duke theksuar se qeveria “Rama” u mohua nga 85% e qytetarëve shqiptarë, të cilët sipas tij refuzuan varfërinë dhe papunësinë.
“Shqiptarët janë pa punë, sepse ekonominë dhe mundësitë ekonomike i kanë marrë oligarkët dhe klientët. Paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe klientët e Ramës, varfërohen njerëzit e thjeshtë dhe të pambrojtur. Edi Rama i shpërfill shqiptarët, dhunon të pambrojturit e të varfërit dhe u shërben të fortëve dhe oligarkëve. Ai është arrogant me njerëzit e thjeshtë, me intelektualët, me artistët, por është i përulur para kriminelëve dhe oligarkëve. Edi Rama është artist i mashtrimit. Çdo gjë që ka premtuar, ka qenë mashtrim, pasi qëllimi i tij i vetëm është të vjedhë. Çdo projekt, program dhe politikë është mashtrim për shqiptarët, në shërbim të tij dhe oligarkëve. Kjo është një qeveri që noton në paligjshmëri, sepse ka ardhur nga paligjshmëria. – u shpreh Basha. – Beteja popullore, e organizuar nga opozita, vetëdijësimi kombëtar dhe kurajo për t’u përballur, e ka bashkuar shumicën ‘Rama ik’ në vendimin e pakthyeshëm popullor për zgjedhje të parakohshme parlamentare dhe në të njëjtën ditë për të zgjedhur, sipas Kushtetutës, edhe pushtetin vendor, kryetarët e Bashkive dhe këshillat bashkiakë”, deklaroi në Maliq Kryetari i PD, Lulzim Basha./ Opinion.al E.Xh.
