Vendosja e tritolit në banesën e gjyqtarit të Shkodrës, Tonin Sterkaj është dënuar edhe nga kryetari i grupit parlamentar të PD, Gazment Bardhi.
Nëpërmjet një postimi në rrjetet sociale, Bardhi shkruan se aktet për intimidimin me metoda mafioze të magjistratëve në detyrë, janë jo vetëm cënim i sigurisë së tyre dhe familjes së tyre, por prekin gjithë shoqërinë.
Bardhi u kërkon autoriteteve zbardhjen e menjëhershme të ngjarjes, si dhe autorët të marrin dënimin sipas ligjit.
Reagim i Kryetarit të Grupit Parlamentar të PD, Gazment Bardhi
Dënoj me forcë aktin kriminal, të dyshuar si i lidhur me detyrën, ndaj gjyqtarit të Shkodrës Tonin Sterkaj. Aktet për intimidimin me metoda mafioze të magjistratëve në detyrë, janë jo vetëm cënim i sigurisë së tyre dhe familjes së tyre, por prekin gjithë shoqërinë.
Duke u solidarizuar plotësisht me gjyqtarin Sterkaj dhe familjen e tij, i bëj thirrje institucioneve përgjegjëse që të zbardhin menjëherë çështjen dhe të vendosin para përgjegjësisë personat përgjegjës, duke i bërë shembull të vendosmërisë sonë për të mos lejuar cënimin e sigurisë ndaj magjistratëve në detyrë.
