Gazment Bardhi ka reaguar lidhur me konferencën për shtyp të Lulzim Bashës, duke thënë se koha e zgjimit të opozitës me telekomandim ka marrë fund prej kohësh.
Përmes një reagimi në rrjete sociale, Bardhi shkruan se Basha e la për 12 vjet Partinë Demokratike në opozitë dhe se sot shpalli të vdekur 60 mijë anëtarë të partisë.
Ai thekson se leksionet boshe mbi opozitën ka 12 vjet që i dëgjojnë.
Sipas tij, edhe pse vendi po rrëshket në autoritarizëm, Basha ka që nga 21 Mars 2022 që nuk vjen në Kuvend dhe nuk ka bërë asnjë kallëzim apo denoncim në prokurori kundër Qeverisë.
“Të të bëjë manual sesi bëhet opozita përgjegjësi kyç që e la partinë 12 vjet në opozitë, që shpalli sot të vdekur 60 mijë anëtarë të partisë vetëm se shprehin kundërshtinë për të kaluar nga dështimi në dështim, deputeti opozitar që ka nga 21 Mars 2022 që nuk vjen në Kuvend, që ska bërë asnjë kallëzim në prokurori kundër Qeverisë dhe asnjë denoncim ndaj Qeverisë, që ka 5 muaj që vjen vërdall si memec pa thënë asgjë mbi realitetin politik, edhe pse vendi po rrëshket në autoritarizëm, është për të qeshur dhe për të qarë njëkohësisht.
Koha e zgjimit të opozitës me telekomandim ka marrë fund prej kohësh. Opozita është në betejë me regjimin e Edi Ramës dhe beteja është e vetmja formë e përballjes me një regjim. Leksionet boshe mbi opozitën kemi 12 vjet që i dëgjojmë dhe realiteti kur zgjohesh nga ëndrra e gjumit të thellë është që Rama vazhdon të jetë Kryeministër! Shqipëria ka nevojë për ndryshim dhe kjo mund të arrihet vetëm duke qenë më së pari të vërtetë”, shkruan Bardhi./Opinion.al
