Përfundon dëshmia e Gazment Bardhit në gjykatë në lidhje me dosjen “Babalja”. Sekretari I Përgjithshëm I PD deklaroi jashtë dyerve të gjykatës për median se ka dëshmuar për ato detaje që ka patur dijeni për çështjen dhe se nuk ka patur një përballje me Fredi Alizotin.
“Jo nuk pati përballje. Ai pretendoi qe rastësisht jemi takuar por kjo nuk është e vërtetë. Sot e pash për herë në sallën e gjyqit. Ndërsa me Albert Veliun jam takuar darkën kur bëmë denoncimin e çështjes nga selia e PD” tha Bardhi.
Në Gjykatë, Bardhi ka deklaruar se nuk ka pasur njoftim për seancë dhe se ka qenë i informuar për të vetëm nga media. “Qoftë kërkesa e Prokurorisë, qoftë vendimi i Gjykatës është në kundërshtim me ligjin. Unë jam paraqitur sot bazuar në njoftimin në media për seancën”, mësohet të ketë thënë ai.
I pyetur nga prokurori i çështjes si i ka rënë në dorë regjistrimi, Bardhi është përgjigjur: “Si çdo denoncim që mbërrin në PD, ky regjistrim ka qenë një investigim gazetaresk. Për shkak të rrezikshmërisë së Agron Xhafajt, si vëlla i ministrit të Brendshëm, ia ka vënë në dispozicion PD. PD ka bërë verifikimet e veta. Ka rezultuar se Agron Xhafaj kishte një dënim të pa vuajtur. Fatmirësisht drejtësia u vu në vend se Xhafaj u vetëdorëzua dhe u dërgua të kryente dënimin. Në denoncimet që bën PD ne nuk kemi detyrim të bëjmë akt ekspertiza, por nga verifikimet na rezultoi se Agron Xhafaj ishte i përfshirë në trafikun e drogës. Denoncuan një person të përfshirë në veprimtari kriminale dhe që kishte mbrojtjen e vëllait si ministër i brendshëm. Së bashku me dy kolegët bëmë denoncimin në një konferencë për shtyp. Ka një autorësi të një gazetari që ka kryer një investigim, të cilit i rrezikohej jeta. Bashkë me Salianjin dhe Alibeajn e publikuam”.
Ai tha më tej për gazetarët se sot ende nuk ka asnjë të dhënë mbi hetimin pasuror të nisur ndaj Agron Xhafajt dhe se procesi në Gjykatën e Tiranës është i montuar politikisht për të intimiduar opoztitën.
“Sot që ne flasim nuk ka asnjë rezultat për hetimin ndaj Agron Geron Xhafajt. Ka kaluar më shumë se një vit nuk e di njeri se ç’po bëhet me këtë hetim pasuror. E gjitha kjo provon se ky proces është i montuar politikisht. Qëllimi i tyre është intimidimi i opozitës për të mos denoncuar skandale politike” tha Bardhi. /Opinion.al
