Kreu i Grupit Parlamentar të PD-së, Gazment Bardhi, pas mbledhjes së deputetëve demokratë, ka dalë në një deklaratë për media, ku ka zbardhur diskutimet dhe ka informuar për situatën në të cilën mazhoranca ka vendosur opozitën.
Sipas Bardhit 31 projektligje janë bllokuar dhe nuk merren në shqyrtim as nga komisionet parlamentare, ndërsa ka shtuar se brenda një jave janë rrëzuar tre kërkesa për Komisione Hetimore.
Ai i bëri thirrje mazhorancës që t’i kthehet rrugës së kushtetutshmërisë ndërsa theksoi se nëse do të bllokojë opozitën do të marri mbrapsht dhe pasojat.
“Dua t’ju informoj se kemi diskutuar me shumë përgjegjshmëri, situatën në të cilën mazhoranca ka vendosur opozitën dhe parlamentarizmin në vend. Dua t’ju informoj se përgjatë dy viteve, me urdhër politik të Ramës janë bllokuar 31 projektligje, të cilat nuk merren në shqyrtim as nga komisionet parlamentare, dhe prej kohësh janë përfshire në programin e punës së Kuvendit pa një datë shqyrtimi.
Brenda një jave, janë rrëzuar 3 kërkesa për komisione hetimor, duke u refuzuar 40 deputetëve të drejtën për të ushtruar kontroll parlamentar. Kemi kërkuar 3 komisione hetimore në interes të qytetarëve.
Ajo që ndodhi këtë të enjte, opozitës iu mohua e drejta për të pasur anëtaret që dëshiron në komisionin e reformës zgjedhore. Edhe pse gjatë dy viteve kemi pritur përushjen e rekomandimeve të OSBE/ODIHR nëpërmjet një komisioni të posaçëm mbipartizan, për herë të parë në këto 32 vite mazhoranca i ka hequr të drejtën pjesës dërrmuese të deputetëve…
Opozitës i janë mohuar të gjitha të drejtat, duke iu mbyllur çdo rrugë. Vullneti ynë është për një parlament fuksional. Kemi bërë gjithçka që kjo të ndodhë. E treguan të enjten për një rezolutë të përbashkët për Kosovën. Por kur ti i bllokon të drejtat opozitës, ke bllokuar parlamentin. Apeloj për mazhorancës ti kthehet rrugës së kushtetutshmërisë dhe zhvillimit normal të parlamentit. Nëse ke vendosur të bllokosh opozitën, duhet të marrësh mbrapsht dhe pasojat”, tha Bardhi.
