Në seancën e sotme parlamentare ka vijuar sërish debati lidhur me çështjen se kush është kryetari i grupit parlamentar i PD.
Edhe pse fillimisht nuk e lexoi shkresën, drejtuesja e seancës së sotme Ermonela Felaj u shpreh se një pjesë e deputetëve të PD i kanë dërguar asaj një shkresë ku deklarojnë se konfirmojnë se kreu i grupit është Gazment Bardhi.
Sipas saj në këtë rast nuk ka qenë nevoja të njoftohet Kuvendi, sepse nuk kemi të bëjmë me ndryshim të kreut të grupit, por me konfirmim, duke deklaruar se kemi të njëjtat grupe parlamentare, e duke njohur kështu Bardhin në krye të grupit të PD.
Ajo theksoi se shkresa që mban titullin ‘njoftim’, nuk është njoftim nga forma por hartim.
“Tani shkresa që i është dërguar kryetares së Kuvendit, nuk është një njoftim për ndryshimin e kryesisë së grupit parlamentar, por më parë se të lexoj atë që keni shkruar, do u lexoj nenin 16, i cili thotë ‘për zgjedhjen e kryesisë dhe çdo ndryshim të mëvonshëm vihet në dijeni kryetari i kuvendit’.
Kjo shkresa që mban titullin ‘njoftim’, vetëm njoftim nuk është as nga forma, por është hartim, thotë: grupi parlamentar i PD diskutoi mbi situatën e paprecedentë të krijuar nga ju, lidhur me kryesinë e grupit tonë’.
E çfarë do me thënë kjo? Është njoftim?
Dhe vazhdojmë: për këtë arsye, ne deputetët anëtarë të grupit të PD, ju konfirmojmë se kryetar është Bardhi, dhe qartësisht konfirmimi nuk është ndryshim dhe s’ka nevojë të bëhet njoftim Kuvendit kur nuk ka ndryshim”, u shpreh Felaj.
“Për një çështje të grupit nuk ishte pse të flisnin deputetë që janë jashtë grupit. Kuvendi është i gatshëm të veprojë komform rregullave, ndaj deputetët që janë pjesë formalisht të PD, thirrini arsyes dhe bëjini vetë rregullimin brenda grupit.
Nuk mund ta bllokoni kuvendin me çështje të brendshme. Nuk zgjedhim ne grupin tuaj. Ne kemi të njëjtat grupe parlamentare, dhe deputetë jashtë grupeve parlamentare”, u shpreh Felaj.
