Sekretari i Përgjithshëm i PD, Gazment Bardhi, është shprehur se partia më e re Bindja Demokratike nuk mund të marrë pjesë në zgjedhjet lokale më 30 qershor.
Sipas Bardhit, Bindja Demokratike nuk mund të futet në zgjedhje pasi tashmë ka skaduar afati për regjistrimin në KQZ, dhe se ende nuk është regjistruar në Gjykatë.
Sekretari i Përgjithshëm i PD, i ftuar në “Ora News”, tha gjithashtu se futja Partisë Bindja Demokratike në zgjedhje nënkupton se po i shërben qeverisë.
Pjesë nga intervista
Pyetje: Pretendojnë të përfaqësojnë shqiptarët?
Bardhi: Së pari shqiptarët janë të përfaqësuar nga ata që kanë votuar. Nuk mund të thuash se do përfaqësosh shqiptarët, kur shqiptarët nuk të kanë dhënë mandat përfaqësimi. E dyta, të pretendosh të hysh në zgjedhje, kur nuk ke krijuar ende parti, sepse sot ka skaduar afati, do të thotë se je duke i kryer një shërbim Edi Ramës, pasi si rregull, dhe këtu po flas si jurist, kjo parti nuk mund të marrë pjesë në zgjedhje, sepse nuk është regjistruar në gjykatë. Në zgjedhje nuk marrin pjesë kandidatët për parti politike, por marrin pjesë partitë politike. E vetmja rrugë apo mënyrë që kjo parti, kandidatë për të qenë parti për të qenë të saktë, të marrë pjesë në zgjedhje, do duhet që Edi Rama t’i japë një urdhër politik KQZ-së për ta regjistruar këtë parti në zgjedhje. Nëse kjo ndodh, besoj se shqiptarët kuptojnë realitetin se ku është krijuar kjo parti dhe kujt i shërben kjo parti e krijuar./ Opinion.al E.Xh.
