Kryetari i Grupit Parlamentar të PD, Gazment Bardhi, ka depozituar në Kuvend një projekt-rezolutë për mbështetjen e Kosovës, lidhur me situatën e krijuar gjatë ditëve të fundit në veri të saj.
Projekt-rezolutë vlerëson punën e policisë së Kosovës për ruajtjen e integritetit territorial të vendit dhe i kërkon mes të tjerash qeverisë së Shqipërisë që të përmbushë detyrimin kushtetutes të mbrojtjes së të drejtave kombëtare të popullit shqiptar që jeton jashtë kufijve të saj.
“Draftrezoluta thekson se Kuvendi i Shqipërisë ofron mbështetjen e plotë dhe të parezervë për Kosovën dhe institucionet e saj, në ushtrimin e përgjegjësisë për ruajtjen e rendit dhe sigurisë publike në tërë territorin e Republikës së Kosovës, si dhe mbështet të gjitha institucionet e Republikës së Kosovës që të vazhdojnë punën e përbashkët për integrimin e plotë dhe bashkëjetesën mes të gjitha komuniteteve, pa dallim, që jetojnë në Republikën e Kosovës. Në vijim të kërkesës së autoriteteve të Kosovës, për një hetim ndërkombëtar ndaj Serbisë, Rezoluta e propozuar nga Grupi Parlamentar i PD i kërkon qeverisë shqiptare që të ndërmarrë çdo iniciativë apo nismë të nevojshme në këtë drejtim, duke përmbushur detyrimin kushtetutes të mbrojtjes së të drejtave kombëtare të popullit shqiptar që jeton jashtë kufijve të saj”.
Gjithashtu, në njoftimin e publikuar nga Partia Demokratike kërkohet zhvillimi i një debati në Kuvend për qëndrimin e shtetit shqiptar në raport me zhvillimet në Kosovë, nisur kjo dhe nga disa qëndrime që ka mbajtur kryeministri Rama, që sipas demokratëve bien ndesh me interesin e Kosovës.
