Barcelona, një skuadër me yje, hedh sytë nga lojtarët e kombëtares italiane. Të befasuar nga paraqitja e kombëtares “azzurre” në Euro 2016, trajneri Luis Enrique po mendon të afrojë te skuadra “blaugrana” dy nga lojtarët e këtij ekipi. Bëhet fjalë për dy anësorët Matteo Darmian, që luan me Manchester United dhe Mattia De Sciglio, që aktivizohet me skuadrën e Milanit. Sipas skuadrës spanjolle, ata janë dy elementët e duhur për të luajtur në krahë dhe vlerësohen shumë nga stafi drejtues.
Lajmin e një transferimi të mundshëm të dy futbollistëve italianë te Barcelona e ka konfirmuar sot e përditshmja “Mundo Deportivo”, që shton se bisedimet kanë nisur që në fillim të kësaj jave. Darmian është prej kohësh në shënjestrën e skuadrës katalanase, që kërkon t’ia marrë “djajve të kuq”, ndërkohë që kartoni i tij shkon 20 milionë euro. Ndërsa De Sciglio, për spanjollët konsiderohet si “Maldini i vogël” dhe drejtori sporti Braida do të tentojë ta sjellë në Spanjë sezonin e ardhshëm. Natyrisht që në listë janë edhe Fabian Johnson (Borussia Monchengladbach dhe Wendell (Leverkusen).
