“Nëse i paguan kundërshtarët për të fituar ndeshjen, nuk ka asgjë që nuk shkon!” Ky ka qenë gjithmonë një justifikim për “legjendën” e valixheve me parà, që lihen në fushën stërvitore të skuadrave,për të fituar ndaj rivalëve përkatës në javën e fundit të kampionatit. “Los Maletines” (valixhet) kanë qenë pjesë e futbollit spanjoll, ashtu si tifozët që mbushin stadiumet sepse është diell apo trajnerët që pinë duhan në dhomat e zhveshjes. Megjithatë, artikulli 268 i rregullores së futbollit në La Liga, që prej disa vitesh, i ndalon këto pagesa nën dorë. Sipas “El Confidencial Digital”, 22 agjentë taksash nga shteti spanjoll kanë dalë në kontroll për të parë atë që ndodh në klubet e La Liga.
Me Real Madrid që ka nevojë nga Granada të marrë të paktën një pikë në ndeshjen e së shtunës kundër Barcelonës, në mënyrë që skuadra “merenges” të fitojë titullin, janë hedhur sërish hipotezat e pagesave nën dorë. Atëherë, logjika të bën të mendosh se edhe Barcelona do të paguajë diçka që futbollistët e Deportivo La Coruna, të bëjnë maksimumin ndaj Real Madrid. Ky është një koncept që ekziston në Spanjë, teksa në Premier League është logjika: një skuadër është e detyruar të luajë gjithmonë në maksimum, për respekt të sportit, kampionatit dhe tifozëve, nuk ka nevojë për pagesa shtesë.
Në sezonin 1992-93, Barcelona fitoi kampionatin pasi fitoi në javën e fundit ndaj Sociedad dhe Real Madrid u mposht 2-0 në fushën e Tenerife. Edhe një vit më vonë u përsërit situata: Barcelona mposhti Bilbao dhe e fitoi La Liga me një pikë më shumë se Real Madrid, që sërish u mposht nga Tenerife. Në të dyja rastet u la se ishullorët kishin marrë një shpërblim të majmë nga katalanasit. “Nuk i kemi paguar kurrë. E vetmja gjë që na kërkuan ishte një miqësore në stadiumin e tyre para fillimit të sezonit të ri,” – deklaroi ish-presidenti i Barcelonës, Joan Gaspart.
Dy futbollistët e Granada, David Barral dhe Isaac Cuenca, morën pjesë në një emision satiristik për “Tele 5” duke pozuar me një valixhe të mbushur me kartëmonedha 500 euroshe. “Ishte e këndshme, por nuk janë paràtë tona. Personalisht nuk do të pranoja kurrë shpërblim të tillë dhe do të jap më të mirën e vetes siç kam bërë gjithmonë.” – tha Barral, ndërsa Cuenca shtoi: “Nuk do të bëj asgjë të paligjshme, sepse është më mirë të jesh në fushën e lojës, sesa në burg.” Gjyqtari i ndeshjes, Barcelona-Granada do të jetë Alejandro Hernandez Hernandez, ai që anuloi golin me kokë të Gareth Bale në përballjen e fundit “El Clasico”.
