Banorët e zonës së “5 majit” kanë protestuar sërsh kundër projektit që prek banesat e tyre. Qytetarët të cilët kanë kundërshtuar projektin, mbrëmjen e sotme kanë bllokuar në shenjë proteste rrugën pranë tregut të Medresesë në Tiranë.
Pas bllokimit të rrugës, forcat e policisë kanë mbërritur pranë tregut të Medresesë dhe u kan ë kërkuar qytetarëve që të bllokojnë rrugën, pasi po shndërrohen në burim aksidentesh. Ndërkohë, është krijuar një radhë e gjatë automjetesh.
Një nga banorët shprehet se të drejtat e tyre nuk po respektohen nga kryebashkiaku Erion Veliaj dhe se duan një kontratë që t’i sigurojë një shtëpi tjetër pas prishjes së asaj në zonën e “5 majit”.
“Kemi dalë në protestë, do të bllokojmë kryqëzimet, do e shohin që kemi 4 muaj që protestojmë, nuk na është dhënë asnjë lloj sqarimit, asnjë zgjidhje Bashkia, jemi kundër mënyrës së trajtimit, një kontratë të njëanshme. Nëse Veliaj do e kishte bërë një dëgjesë publike, sot nuk do ishim në protestë. Ne deri më sot nuk na është dhënë zgjidhje, ndoshta sensibilizohet Veliaj. Ne jemi banorë, kemi familje, të drejta, të drejtë fjale, ndoshta në Astir kanë fituar, në zonën tonë, me aq sa kemi lexuar dhe informuar, kjo kontratë e Veliaj është e pavlefshme, me një VKM po merr 430 banesa, VKM nuk është ligj. Duam kontratat reale, jo premtime”,-tha një nga banorët.
Më 19 janar Inspektorati Kombëtar i Mbrojtjes së Territorit ndërmori aksionin për prishjen e banesave në zonën e 5 majit në Tiranë duke i hapur rrugën procesit të rindërtimit.
Shembja e banesave u shoqërua me kundërshtinë e banorëve, të cilët që nga ajo ditë kanë ndërmarrë një sërë protestash, një tek parlamenti dhe Bashkia dhe më e fundit ka qenë protesta e së shtunës, ku bllokuan për një orë një prej akseve në ish-sheshin Shqiponja.
