Presidenti i Angolës, Jose Eduardo dos Santos ka emëruar vajzën e tij në krye të Ndërmarrjes Shtetërore të Naftës, “Sonangol”.
Ky emërim bën që Isabel dos Santos të marrë nën kontroll edhe naftën. Dy vjet më parë ajo u listua nga “Forbes” si afrikania më e pasur.
Isabel dos Santos drejton dy grupimet më të mëdha bankare në Afrikë, të cilat kanë dhënë hua marramendëse për të nxjerrë Portugalinë nga kriza.
Dhe mediat në atë kohë shkruanin “Tashmë është Angola që kolonizon Portugalinë”.
“Kolonizimi bankar” i Portugalisë
Kur gruaja më e pasur në Afrikë, Isabel dos Santos bëri të parën dalje publike në një ngjarje arti në qytetin verior të Oportis në Portugali, shtypi dhe mediet i kushtuan më shumë se vëmendje.
“Ajo rrezaton klas, elegancë dhe kulturë”, shkruante revista më e madhe e shoubizit, “Caras”. Dos Santos është gruaja më e pasur në Afrikë dhe e bija e Presidentit të Angolës, Jose Eduardo dos Santosit.
Ajo sapo ka zbuluar planet për bashkimin e dy bankave më të mëdha, “Millennium BCP” dhe BPI-së, të cilat do të krijonin një gjigand të ri financiar në Portugali. Kjo marrëveshje do të pasojë me influencën angolane në ekonominë e Portugalisë, e cila po vuan ende nga krizat e borxheve të eurozonës.
“Ka lidhje të forta mes Portugalisë dhe Angolës. Të dyja ndajnë të njëjtën ngjyrë; kanë kultura të përafërta, shtuar këtu edhe lidhje të ngushta mes dy popujve. Por, kam një parandjenjë se rolet historike të dy vendeve karshi njëra-tjetrës po pësojnë një rotacion”, thotë Cels Filipi, zv/drejtor i të përditshmes ekonomike “Jornal de Negocios”.
“Portugalia, e cila ka qenë kolonizatore, tashmë po kolonizohet nga investimet që vijnë nga Angola”, thotë ai. Bashkimi i dy bankave do të krijojë kapitalin më të madh bankar në vend, që kap shifrat e 125 miliardë eurove. Kjo bankë do të luajë një rol të madh në Angola, Poloni dhe Mozambik, ndërsa në Portugali do të kontrollojë më shumë se 30 % të tregut të brendshëm.
