Rreth 933 milionë Euro, është shuma që Banka e Shqipërisë ka tërhequr nga tregu valutor i brendshëm, me qëllim rritjen e rezervës valutore, por edhe stabilizimin e kursit të këmbimit gjatë vitit 2024.
Në krahasim me vitet e mëparshme, shuma e tërhequr ka qenë më e larta, duke shënuar kështu një rekord historik dhe njëkohësisht ka zbutur goditjet e kursit të këmbimit nga zhvlerësimi i Euros.
Gjatë vitit 2024, Banka e Shqipërisë ka blerë në total rreth 283.80 milionë euro nëpërmjet ankandeve. Sipas njoftimit të bankës qëndrore krahas blerjeve të planifikuara me ankand, të cilat kanë si objektiv “ruajtjen e nivelit dysheme”, paralelisht janë blerë në tregun e brendshëm, 649 milionë Euro, duke arritur vlerën rekord, prej 933 milionë Eurove të tërhequra nga tregu gjatë vitit 2024.
Për sa i përket vitit 2025, Banka Qendrore ka planifikuar të blejë 270-350 milionë Euro për të plotësuar nevojat e rezervës valutore.
Por pavarësisht planifikimeve, banka qëndrore me qëllim parandalimin dhe zbutjen e lëvizjeve të forta të kursit të këmbimit ndërhynë në treg duke tërhequr euro, sidomos në periudhën e pikut të sezonit veror kur edhe prurjet e valutës janë të larta nga turistët e huaj.
Klan News
