Sipas një artikulli të botuar sot në gazetën britanike “Të Daily Telegraph” bandat kriminale shqiptare po përdorin Facebook-un për aktivitete kriminale, si emigracioni i paligjshëm, klandestinët në Britani, bërja e martesave të rreme dhe mashtrimi me anë të falsifikimit të dokumenteve të identifikimit dhe patentave të gjuhës angleze.
Artikulli i referohet faqes në Facebook ‘Shqipet në Londër’ e cila ka 123 mijë ndjekës dhe siç shkruhet “skemat kriminale postohen publikisht”.
“Faqja u krijua nga Fari Lleshi, i dënuar për vjedhje banke i cili hyri në mënyrë të paligjshme në Mbretërinë e Bashkuar pasi kishte vuajtur 6 vite burg në Itali për grabitjen e 20 mijë eurove në një bankë në Itali. Ai u deportua në mars, pasi u dënua për posedim droge në Britani”
Në artikull tregohet se si nëpërmjet kësaj faqjeje jepen njoftime për emigrantët e paligjshëm shqiptarë që paralajmërohen për bastisjet e Forcave Kufitare duke postuar fotografi të zyrtarëve dhe furgonëve të tyre në kontrolle dhe duke treguar vendet për të shmangur.
“Përshëndetje shqiptarë, kam një apel për të gjithë ju që jeni pa dokumenta në MB. Kujdes në Stacionin Turnpike Lane, është plot polici”
“Ju lutem ndonjë këshillë Nëse dini ndonjë mënyrë të sigurt se si të iki në Angli pa ndonjë rrezik” shkruhet në një postim, përgjigjja ndaj të cilit ishte kontrabandimi nga Irlanda për 1,500 paund”
The Telegraph tentoi ti kontaktojë administratorët e faqes por ata refuzuan të përgjigjeshin dhe pas një ore e mbyllën. Problematika që ngrihet është se Facebook nuk ka bërë asnjë përpjekje për ta bllokuar atë .
“Kompanitë e mediave sociale kanë përgjegjësi të parandalojnë aktivitetin e paligjshëm në platformat e tyre. Sipas ligjit kompanitë kanë detyrë të merren me aktivitetin e paligjshëm në platformat e tyre, përfshirë krimin e organizuar të imigracionit.”
Artikulli i referohet të dhënave të ministrisë së brendshme në Mbretërinë e Bashkuar ku thuhet se “Ka dy herë më shumë shqiptarë që hyjnë në mënyrë të paligjshme në Britani përmes porteve në Mbretërinë e Bashkuar, se çdo kombësi tjetër”, ndërsa një raport tjetër shkruan se “bandat shqiptare kanë zaptuar tregun e trafikut të drogës, veçanërisht kokainës”.
“Kërcënimi me të cilin po përballemi me grupet shqiptare të krimit është i rëndësishëm. Londra është qendra e tyre kryesore, por ato janë vendosur në të gjithë Mbretërinë e Bashkuar,” tha një zëdhënës i NCA për The Telegraph.
Artikullin e plotë lexojeni KËTU/Opinion.al
