Pasditen e sotme, SPAK ka dalë në një njoftim zyrtarë lidhur me megaoperacionin që u zhvillua në disa qytete të vendit.
Prokuroria e Posaçme ka zbardhur detaje nga operacioni policor i zhvilluar dy ditët e fundit dhe forca të shumta mësynë në bazën e Ervis Martinaj në Fushëkuqe, në shtëpinë e vëllezërve Bami në Nikël por edhe në prona të eksponentëve të krimit në Durrës, Tiranë, Lezhë e Vlorë.
SPAK bën me dije se ky operacion u krye në bashkëpunim me Europol dhe Eurojust ka arritur të sekuestrojë një shumë prej rreth 3,5 milionë euro.
Gjatë operacionit që zgjati mbi 20 orë, dhjetëra oficerë të BKH-së por edhe efektivë të shumtë policie kanë mësyrë në mbi 50 prona, ndërsa GJKKO ka caktuar masën arrest me burg për 50 të dyshuar për disa ngjarje kriminale.
Në njoftim del në pah bashkëpunimi shumë i ngushtë mes grupit të të shumëkërkuarit të drejtësisë Ervis Martinaj dhe një tjetër grupi kriminal me bazë në Lezhë, që drejtohet nga ish-deputeti i PS, Arben Ndoka.
“Në qendër të këtyre grupeve kriminale është grupi kriminal i krijuar dhe drejtuar nga shtetasi E.M., i cili është në aleancë me grupin kriminal që vepronte në qytetin e Lezhës të drejtuar nga shtetasi A. N. Këta dy grupe kriminale, për arritjen e qëllimit kriminal kanë kontaktuar anëtarë të një grupi tjetër kriminal i cili vepronte në qytetin e Durrësit. Gjithashtu, të dy këto grupe kriminale kanë rekrutuar vrasës me pagesë të cilët veprojnë kryesisht në zonën e Fushë – Krujës dhe në zonën e Burrelit. Po kështu për të realizuar qëllimet kriminale E.M., kontakton shtetasin V.I., i cili sapo kishte përfunduar vuajtjen e dënimit me burgim i kërkon vrasjen e shtetasit F.H. Në ndihmë të grupeve kriminale të drejtuara E.M. dhe A.N., vijnë edhe shtetasit E.Sh. dhe A.A., të cilët edhe pse në kushtet e paraburgimit ndihmojnë E.M. dhe A.N., në realizimin e qëllimit kriminal që është vrasja e D.B. etj,”-thuhet në njoftimin e SPAK.
