Të gjithë pushuesit që do të zgjedhin bregun e jugut për pushime, krahas autostradës Fier-Vlorë do të kenë në dispozicion edhe rrugën e vjetër që lidhte këto 2 qytete më parë.
Punimet për rehabilitimin e saj kanë përfunduar dhe rruga është e hapur për automjetet. Ministrja e Infrastrukturës dhe Energjisë, Belinda Balluku inspektoi punimet e kryera ku theksoi se edhe ky segment veç lehtësimit të trafikut do t’i vijë në ndihmë turizmit.
“Kemi shkurtuar 5 km. Janë bërë punime thellësisht të nevojshme përsa i përket të gjithë rrjedhës së ujit që mblidhej gjatë shirave. Dhe nga ana tjetër e kemi zgjeruar për korsi dhe asfaltimi është asfaltim me shtresë. Vlora si zakonisht është me shumë fat. Do vazhdojmë me kantiere të tjera ku ka nisur trafiku të jetë i bollshëm, duke qenë se nuk themi dot i rënduar se nuk kemi trafik të rënduar, shpresoj tani që koha të jetë e mirë dhe vizitorët e huaj që kanë vërshuar në Shqipëri të kënaqem me bukuritë e Shqipërisë, me motin tonë”.
Në shërbim të turizmit në Vlorë po punohet me hapa të shpejtë edhe në ndërtimin e aeroportit./ Tv Klan
