BALLSH– 780 punonjësit e rafinerisë së naftës në Ballsh janë ngritur sot në një protestë, për shkak se nuk marrin rrogën që prej muajit korrik.
Protesta u mbështet edhe nga qytetarët. Ata nisën marshimin nga uzina dhe u ndalën para Prefekturës së Ballshit, ku me pankarta në duar kanë përsëritur thirrjet “Duam paratë tona”. Ndër të tjera ata i kanë bërë thirrje qeverisë të ndërhyrë dhe t’i japë fund situatës ku ndodhen.
“Nuk do t’ia dijë njeri fare që rrojmë apo nuk rrojmë. Atje punojnë 1000 burra dhe gra, llogarite sa njerëz kanë mbrapa ata që duan të hanë dhe ushqehen. Këtu bëhet luftë për mbijetesë, që nga muaji korrik që nuk kemi marrë lekët tona. S’kemi bukë të hamë”, tha njëri prej protestuesve. Ndërsa një tjetër u shpreh “djali im ka lënë shkollën se nuk kam lekë ta çoj në shkollë. Kjo nuk është e drejtë. Nuk kemi lekë më, mbaruam. Në rast se nuk zgjidhet kjo punë sa më shpejt do i përshkallëzojmë ndryshe këto punë”.
Kjo është e disata herë që këta naftëtarë hidhen në protestë, por Ministria e Energjisë nuk ka dhënë një përgjigje për ta.
