“Kam qenë shënjestër e koreve raciste gjatë gjithë ndeshjes”. Ky ishte tweet-eri i Mario Balotelli-t që shkaktoi polemika të shumta. Sulmues italian e bëri këtë postim mëngjesin e së shtunës pak orë pas ndeshjes që u mbyll në barazim 1-1 mes Nice-s së tij në fushën e Bastia-s. Ndërkohë klubi i akuzuar është mbrojtur përmes një komunikate të publikuar në faqen e tij zyrtare.
“Një mesazh i postuar në një rrjet social nga Mario Balotelli, ku deklaron se ndaj tij tifozët e Bastia-s kanë bërë gjestet e majmunit gjatë gjithë takimit me Nice-n, ka njollosur klubin dhe tifozët tanë. Duke mos konstatuar asgjë të të tillë në asnjë moment, duke mos qenë madje edhe të informuar, si nga arbitrat, delegatët apo do lloj përfaqësuesi të Nice-s për ndonjë incident – vijon komunikata – klubi ynë ka mbetur shumë i habitur nga akuzat e lojtarit që hedhin baltë mbi imazhin tonë”.
Gjithmonë të mbështetur te vlerat thelbësore të respektit, CBC është i vetëdijshëm për detyrimin që ka ndaj lojtarëve të të gjitha origjinave që kanë veshur dhe veshin fanellën me ngjyrat tona – përfundon Bastia – Duke marrë shkas nga komunikata e LFP që lajmëron nisjen e hetimeve, klubi ynë është në dispozicion deri sa kjo ngjarje të zbardhet, në mënyrë të pakundërshtueshme dhe pa ekuivoke, ndaj sjelljeve “të trasha” dhe të papranueshme”. Siç konfirmon edhe klubi i Bastia-s, Lega franceze ka nisur një hetim për të kuptuar se çfarë ka ndodhur realisht gjatë ndeshjes që u luajt të premten. Ndërkohë të enjten e ardhshme, Komisioni i Disiplinës do të shqyrtojë raportin zyrtar të arbitrit të takimit, Clement Turpin.
