Presidenti i Republikës iu drejtua vendimarrësve, hartuesve të politikave sociale, mbështetësve të fëmijëve me sindromën Down dhe gjithë atyre me aftësi ndryshe, ti duan këta fëmijë.
Mbrëmja e fundvitit, “Balloja Presidenciale” që mblodhi në Pallatin e Brigadave, drejtuesit e lartë të politikës, njerëz të biznesit, ambasadorë, personalitete të kulturës, emra të njohur të jetës publike dhe përfaqësues të medias, iu dedikua sensibilizimit dhe përkrahjes së kësaj kategorie të shoqërisë, që sot numëron mbi 600 persona me sindromën Down. Kreu i shtetit bëri apel për dashuri, vëmendje dhe integrim të tyre pa rënë në moralizma, por me veprime konkrete.
Nën kujdesin e Zonjës së Parë, Odeta Nishani të ftuarit e veçantë të kësaj mbrëmje, ishin dy të rinj me sindromën Down. Irma Nika, i prezantoi të ftuarit me pikturat e saj, ndërsa amerikani Emmanul Bishop, në drejtimin e mjeshtrit Zhani Ciko, interpretoi në violinë të bukurat arie të Bach e Puccini.
Tingujt lirik, muzika tradicionale qytetare dhe pjesë baleti ishin pjesë të “Ballos Presidenciale”, një mbrëmje që si lajtmotiv ka reflektimin dhe ndërgjegjësimin ndaj shtresave të pambrojtura.
Kontributet që do të mblidhen nga kjo natë bamirësie do t’i jepen Fondacionit Down Syndrome Albania.
Tv Klan
