Ministri i Brendshëm, Taulant Balla u takua sot me Ambasadorin e Mbretërisë së Bashkuar Alastair King-Smith, i cili i përcolli urimet për detyrën e re, nga ana e Suella Braverman, Sekretare e Çështjeve të Brendshme e qeverisë britanike.
Në një postim në rrjetin social “Facebook” Balla shkruan se në takim u fol për fushat e bashkëpunimit mes dy vendeve dhe në mënyrë të veçantë, për një bashkëpunim edhe më të ngushtë për sa i përket sigurisë publike, luftës kundër krimit të organizuar dhe emigracionit ilegal.
“Me Ambasadorin Alastair King-Smith, i cili më përcolli përgëzimet e marrjes së detyrës nga Sekretarja Braverman dhe me angazhimin për një bashkëpunim edhe më të ngushtë mes dy vendeve tona në çështjet e sigurisë publike, përfshirë luftën kundër krimit të organizuar dhe emigracionin ilegal”, shkruan Balla në postimin e tij./Opinion.al
