Ministri i Shtetit, Taulant Balla, zhvilloi një takim në Strasburg me raportuesin për Shqipërinë në Parlamentin Evropian, Andreas Schieder.
Përmes një postimi në rrjete sociale, Balla thotë se vlerësoi raportin vjetor për Shqipërinë, i cili pritet të miratohet nga Komiteti i Politikës së Jashtme të Parlamentit Evropian (AFET).
Ndërkohë Schieder thekson se Shqipëria mund të quhet me krenari “favoriti kryesor” mes kandidatëve për tu anëtarësuar në Bashkimin Europian.
“Strasburg
Takimi me Raportuesin e Parlamentit Europian Andreas Schieder një mik dhe mbështetës i vyer i Shqipërisë.
Vlerësova Raportin vjetor për Shqipërinë, i cili pas miratimit në Komitetin e Politikës së Jashtme (AFET) do të miratohet edhe në seancën plenare të Parlamentit Europian më 8-9 Korrik 2025.
Shqipëria mund të quhet me krenari “favoriti kryesor” mes kandidatëve për tu anëtarësuar në Bashkimin Europian, vlerësoi zoti Schieder.
Vizioni ynë është i qartë: ne synojmë të mbyllim negociatat e pranimit deri në vitin 2027 dhe të sigurojmë anëtarësim të plotë në BE brenda mandatit të ri qeverisës që na besuan me një shumicë si asnjëherë tjetër shqiptarët në zgjedhjet e 11 Majit”, shkruan Balla.
