Ministri i Shtetit për Marrëdhëniet me Parlamentin, Taulant Balla deklaroi në Kuvend se diaspora mezi po pret të marrë fletën e votimit për të votuar Partinë Socialiste. Ndërsa opozita e di se çfarë e pret më 11 maj, humbja më e madhe që ka parë ndonjëherë.
Balla akuzoi opozitën se po mashtron shqiptarët.
“U gënjye këtu sy për sy nga dikush që s’i vjen turp të gënjejë. Janë 500 mijë, ti thua 80-90 mijë. S’ka pas faj ai tjetri kur thoshte 7 herë 7 se e paska nga babai, qenka e trashëguar.”
Më tej, Balla renditi disa nga arritjet e qeverisë socialiste në transformimin e Shqipërisë me shkolla e spitale të reja.
“Shqipëria përparon. E mbaj mend kur latë pushtetin me 3 milion turistë bashkë me motra vëllezër tanë të Kosovës. Të qëllonin me automatik s’mund të bëje plazh në 2013. Ndërkohë sot Shqipëria është destinacioni më i sigurt jo vetëm në Ballkan por dhe në Europë. Lërini këto. Është një barsoletë. Vazhdoni fërkoni gjoksin se e dini çfarë ju pret”, përfundoi fjalën e tij Balla në parlament.
Përgjigje i ktheu menjëherë Sali Berisha. Ai lexoi nga foltorja disa rreshta nga përgjimet që sipas tij i përkasin dosjes “Toyota Yaris”.
“Jeni katandisur aty ku e meritoni. Por unë meqenëse ky sot tha nuk quhem Tao, por quhem krenar do ju lexoj pak disa rreshta prej tij. “Daupaj: s’do t’i bëj nder Ballës unë. Radovan Çela: Këto ditë po më pyet, do jetë prapë Balla, apo do jesh ti? Vladi”. Vladi është ai që priste 5 mln euro në Durrës. “Ok se flas unë, por të na tregojë mënyrën si do ta mbyllë”. “Radovan Çela: Nga Tao, Tao”. Ja pra kush është Tao që rreh gjoksin këtu. Ja pra ku e keni. “Nga Tao Tao dhe thotë se i ka në rregull letrat Tao”. “Radovan Çela: Se bundrra luan edhe me Taon”. E kuptoni sa e rëndë është ajo. “Jo thotë, bundrra do t’ia marrë. E ke gabim, kësaj radhe do t’ia marrë””,-tha Berisha.
