Numri dy i Partisë Socialiste, Taulant Balla ka komentuar protestën e kësaj të shtune të opozitës. Në një reagim në rrjetet sociale ai shkruan se opozitarët janë dhunues përsëritës të imazhit të Shqipërisë e që shquhen vetëm për të prishur gjithçka që Shqipëria ndërton me mund.
“Shqiptarët dinë ta bëjnë qartë diferencën. Kush punon për ta bërë Shqipërinë pjesë të familjes europiane dhe kush janë këta dhunues përsëritës të imazhit të Shqipërisë e që shquhen vetëm për të prishur gjithçka Shqipëria ndërton me mund. Gjithmonë këta do të mbahen mend si dhunues”, shkruan Taulant Balla.
Protesta e opozitës, njësoj si ajo e një muaji më parë nisi si paqësore, por në pak kohë degjeneroi serish në dhunë. Në nisje të saj, vetë kryetari i opozitës dha sinjale që do të ishte një marshim që simbolizonte rrethimin e zyrës së Kryeministrit dhe nuk do të prekej kordoni i vendosur përpara godinës qeveritare.
Por pasi marshuar për 3 herë radhazi në të njëjtin sens rreth Kryeministrisë, protestuesit të drejtuar nga Lulzim Basha u nisën drejt parlamentit, ku nisi edhe përplasja me policinë./Opinion.al
